6. Abhayattheragāthā

26. “Sutvā subhāsitaṃ vācaṃ, buddhassādiccabandhuno;

paccabyadhiṃ hi nipuṇaṃ, vālaggaṃ usunā yathā”ti.

… Abhayo thero….

7. Lomasakaṅgiyattheragāthā

27. “Dabbaṃ kusaṃ poṭakilaṃ, usīraṃ muñjapabbajaṃ;

urasā panudissāmi, vivekamanubrūhayan”ti.

… Lomasakaṅgiyo thero….

8. Jambugāmikaputtattheragāthā

28. “Kacci no vatthapasuto, kacci no bhūsanārato;

kacci sīlamayaṃ gandhaṃ, kiṃ tvaṃ vāyasi [kacci sīlamayaṃ gandhaṃ, tvaṃ vāsi (syā.)] netarā pajā”ti.

… Jambugāmikaputto thero….