4. Posiyattheragāthā

34. “Anāsannavarā etā, niccameva vijānatā;

gāmā araññamāgamma, tato gehaṃ upāvisi [upāvisiṃ (sī.)];
tato uṭṭhāya pakkāmi, anāmantetvā [anāmantiya (sī.)] posiyo”ti.

… Posiyo thero….

5. Sāmaññakānittheragāthā

35. “Sukhaṃ sukhattho labhate tadācaraṃ, kittiñca pappoti yasassa vaḍḍhati;

yo ariyamaṭṭhaṅgikamañjasaṃ ujuṃ, bhāveti maggaṃ amatassa pattiyā”ti.

… Sāmaññakānitthero….

6. Kumāputtattheragāthā

36. “Sādhu sutaṃ sādhu caritakaṃ, sādhu sadā aniketavihāro;

atthapucchanaṃ padakkhiṇakammaṃ, etaṃ sāmaññamakiñcanassā”ti.

… Kumāputto thero….