4. Nītattheragāthā

84. “Sabbarattiṃ supitvāna, divā saṅgaṇike rato;

kudāssu nāma dummedho, dukkhassantaṃ karissatī”ti.

… Nīto thero….

5. Sunāgattheragāthā

85. “Cittanimittassa kovido, pavivekarasaṃ vijāniya;

jhāyaṃ nipako patissato, adhigaccheyya sukhaṃ nirāmisan”ti.

… Sunāgo thero….

6. Nāgitattheragāthā

86. “Ito bahiddhā puthu aññavādinaṃ, maggo na nibbānagamo yathā ayaṃ;

itissu saṅghaṃ bhagavānusāsati, satthā sayaṃ pāṇitaleva dassayan”ti.

… Nāgito thero….