4. Nandakattheragāthā

279. “Dhiratthu pūre duggandhe, mārapakkhe avassute;

navasotāni te kāye, yāni sandanti sabbadā.

280. “Mā purāṇaṃ amaññittho, māsādesi tathāgate;

saggepi te na rajjanti, kimaṅgaṃ pana [kimaṅga pana (sī.)] mānuse.

281. “Ye ca kho bālā dummedhā, dummantī mohapārutā;

tādisā tattha rajjanti, mārakhittamhi bandhane.

282. “Yesaṃ rāgo ca doso ca, avijjā ca virājitā;

tādī tattha na rajjanti, chinnasuttā abandhanā”ti.

… Nandako thero….