6. Ekadīpiyatthera-apadānaṃ

124. “Parinibbute sugate, siddhatthe lokanāyake;

sadevamānusā sabbe, pūjenti dvipaduttamaṃ.

125. “Āropite ca citake, siddhatthe lokanāyake;

yathāsakena thāmena, citaṃ pūjenti satthuno.

126. “Avidūre citakassa, dīpaṃ ujjālayiṃ ahaṃ;

yāva udeti sūriyo, dīpaṃ me tāva ujjali.

127. “Tena kammena sukatena, cetanāpaṇidhīhi ca;

jahitvā mānusaṃ dehaṃ, tāvatiṃsamagacchahaṃ.

128. “Tattha me sukataṃ byamhaṃ, ekadīpīti ñāyati;

dīpasatasahassāni, byamhe pajjalare mama.

129. “Udayantova sūriyo, deho me jotate sadā;

sappabhāhi sarīrassa, āloko hoti me sadā.

130. “Tirokuṭṭaṃ [tirokuḍḍaṃ (sī. syā. ka.)] tiroselaṃ, samatiggayha [sabbatthapi evameva dissati] pabbataṃ;

samantā yojanasataṃ, passāmi cakkhunā ahaṃ.

131. “Sattasattatikkhattuñca devaloke ramiṃ ahaṃ;

ekatiṃsatikkhattuñca, devarajjamakārayiṃ.

132. “Aṭṭhavīsatikkhattuñca, cakkavattī ahosahaṃ;

padesarajjaṃ vipulaṃ, gaṇanāto asaṅkhiyaṃ.

133. “Devalokā cavitvāna, nibbattiṃ mātukucchiyaṃ;

mātukucchigatassāpi, akkhi me na nimīlati.

134. “Jātiyā catuvassohaṃ, pabbajiṃ anagāriyaṃ;

aḍḍhamāse asampatte, arahattamapāpuṇiṃ.

135. “Dibbacakkhuṃ visodhesiṃ, bhavā sabbe samūhatā;

sabbe kilesā sañchinnā, ekadīpassidaṃ phalaṃ.

136. “Tirokuṭṭaṃ tiroselaṃ, pabbatañcāpi kevalaṃ;

samatikkamma [sabbatthapī evameva dissati] passāmi, ekadīpassidaṃ phalaṃ.

137. “Visamā me samā honti, andhakāro na vijjati;

nāhaṃ passāmi timiraṃ, ekadīpassidaṃ phalaṃ.

138. “Catunnavutito kappe, yaṃ dīpamadadiṃ tadā;

duggatiṃ nābhijānāmi, ekadīpassidaṃ phalaṃ.

139. “Kilesā jhāpitā mayhaṃ…pe… viharāmi anāsavo;

140. “svāgataṃ vata me āsi…pe… kataṃ buddhassa sāsanaṃ;

141. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā ekadīpiyo thero imā gāthāyo abhāsitthāti;

ekadīpiyattherassāpadānaṃ chaṭṭhaṃ;