11. Nālakasuttaṃ

684. Ānandajāte tidasagaṇe patīte, sakkañca indaṃ sucivasane ca deve;

dussaṃ gahetvā atiriva thomayante, asito isi addasa divāvihāre.

685. Disvāna deve muditamane udagge, cittiṃ karitvāna idamavoca [karitvā idamavocāsi (sī.)] tattha;

“kiṃ devasaṅgho atiriva kalyarūpo, dussaṃ gahetvā ramayatha [bhamayatha (sī.)] kiṃ paṭicca.

686. “Yadāpi āsī asurehi saṅgamo, jayo surānaṃ asurā parājitā;

tadāpi netādiso lomahaṃsano, kimabbhutaṃ daṭṭhu marū pamoditā.

687. “Seḷenti gāyanti ca vādayanti ca, bhujāni phoṭenti [poṭhenti (sī. pī.), pothenti (ka.)] ca naccayanti ca;

pucchāmi vohaṃ merumuddhavāsine, dhunātha me saṃsayaṃ khippa mārisā”.

688. “So bodhisatto ratanavaro atulyo, manussaloke hitasukhatthāya [hitasukhatāya (sī. syā. pī.)] jāto;

sakyāna gāme janapade lumbineyye, tenamha tuṭṭhā atiriva kalyarūpā.

689. “So sabbasattuttamo aggapuggalo, narāsabho sabbapajānamuttamo;

vattessati cakkamisivhaye vane, nadaṃva sīho balavā migābhibhū”.

690. Taṃ saddaṃ sutvā turitamavasarī so, suddhodanassa tada bhavanaṃ upāvisi [upāgami (sī. pī.)];

nisajja tattha idamavocāsi sakye, “kuhiṃ kumāro ahamapi daṭṭhukāmo”.

691. Tato kumāraṃ jalitamiva suvaṇṇaṃ, ukkāmukheva sukusalasampahaṭṭhaṃ [sukusalena sampahaṭṭhaṃ (ka.)];

daddallamānaṃ [daddaḷhamānaṃ (ka.)] siriyā anomavaṇṇaṃ, dassesu puttaṃ asitavhayassa sakyā.

692. Disvā kumāraṃ sikhimiva pajjalantaṃ, tārāsabhaṃva nabhasigamaṃ visuddhaṃ;

sūriyaṃ tapantaṃ saradarivabbhamuttaṃ, ānandajāto vipulamalattha pītiṃ.

693. Anekasākhañca sahassamaṇḍalaṃ, chattaṃ marū dhārayumantalikkhe;

suvaṇṇadaṇḍā vītipatanti cāmarā, na dissare cāmarachattagāhakā.

694. Disvā jaṭī kaṇhasirivhayo isi, suvaṇṇanikkhaṃ viya paṇḍukambale;

setañca chattaṃ dhariyanta [dhāriyanta (syā.), dhārayantaṃ (sī. ka.)] muddhani, udaggacitto sumano paṭiggahe.

695. Paṭiggahetvā pana sakyapuṅgavaṃ, jigīsato [jigiṃsako (sī. syā. pī.)] lakkhaṇamantapāragū;

pasannacitto giramabbhudīrayi, “anuttarāyaṃ dvipadānamuttamo” [dipadānamuttamo (sī. syā. pī.)].

696. Athattano gamanamanussaranto, akalyarūpo gaḷayati assukāni;

disvāna sakyā isimavocuṃ rudantaṃ,
“no ce kumāre bhavissati antarāyo”.

697. Disvāna sakye isimavoca akalye, “nāhaṃ kumāre ahitamanussarāmi;

na cāpimassa bhavissati antarāyo, na orakāyaṃ adhimānasā [adhimanasā (sī. syā.)] bhavātha.

698. “Sambodhiyaggaṃ phusissatāyaṃ kumāro, so dhammacakkaṃ paramavisuddhadassī;

vattessatāyaṃ bahujanahitānukampī, vitthārikassa bhavissati brahmacariyaṃ.

699. “Mamañca āyu na ciramidhāvaseso, athantarā me bhavissati kālakiriyā;

sohaṃ na sossaṃ [sussaṃ (sī. syā.)] asamadhurassa dhammaṃ, tenamhi aṭṭo byasanaṃgato aghāvī”.

700. So sākiyānaṃ vipulaṃ janetvā pītiṃ, antepuramhā niggamā [niragamā (sī. syā.), nigamā (ka. sī.), niragama (pī.)] brahmacārī;

so bhāgineyyaṃ sayaṃ anukampamāno, samādapesi asamadhurassa dhamme.

701. “Buddhoti ghosaṃ yada [yadi (syā. ka.)] parato suṇāsi, sambodhipatto vivarati dhammamaggaṃ;

gantvāna tattha samayaṃ paripucchamāno [sayaṃ paripucchiyāno (sī. syā.)], carassu tasmiṃ bhagavati brahmacariyaṃ”.

702. Tenānusiṭṭho hitamanena tādinā, anāgate paramavisuddhadassinā;

so nālako upacitapuññasañcayo, jinaṃ patikkhaṃ [pati + ikkhaṃ = patikkhaṃ] parivasi rakkhitindriyo.

703. Sutvāna ghosaṃ jinavaracakkavattane, gantvāna disvā isinisabhaṃ pasanno;

moneyyaseṭṭhaṃ munipavaraṃ apucchi, samāgate asitāvhayassa sāsaneti.

Vatthugāthā niṭṭhitā.

704. “Aññātametaṃ vacanaṃ, asitassa yathātathaṃ;

taṃ taṃ gotama pucchāmi, sabbadhammāna pāraguṃ.

705. “Anagāriyupetassa, bhikkhācariyaṃ jigīsato;

muni pabrūhi me puṭṭho, moneyyaṃ uttamaṃ padaṃ”.

706. “Moneyyaṃ te upaññissaṃ, (iti bhagavā) dukkaraṃ durabhisambhavaṃ;

handa te naṃ pavakkhāmi, santhambhassu daḷho bhava.

707. “Samānabhāgaṃ kubbetha, gāme akkuṭṭhavanditaṃ;

manopadosaṃ rakkheyya, santo anuṇṇato care.

708. “Uccāvacā niccharanti, dāye aggisikhūpamā;

nāriyo muniṃ palobhenti, tāsu taṃ mā palobhayuṃ.

709. “Virato methunā dhammā, hitvā kāme paropare [parovare (sī. pī.), varāvare (syā.)];

aviruddho asāratto, pāṇesu tasathāvare.

710. “Yathā ahaṃ tathā ete, yathā ete tathā ahaṃ;

attānaṃ upamaṃ katvā, na haneyya na ghātaye.

711. “Hitvā icchañca lobhañca, yattha satto puthujjano;

cakkhumā paṭipajjeyya, tareyya narakaṃ imaṃ.

712. “Ūnūdaro mitāhāro, appicchassa alolupo;

sadā [sa ve (pī.)] icchāya nicchāto, aniccho hoti nibbuto.

713. “Sa piṇḍacāraṃ caritvā, vanantamabhihāraye;

upaṭṭhito rukkhamūlasmiṃ, āsanūpagato muni.

714. “Sa jhānapasuto dhīro, vanante ramito siyā;

jhāyetha rukkhamūlasmiṃ, attānamabhitosayaṃ.

715. “Tato ratyā vivasāne [vivasane (sī. syā. pī.)], gāmantamabhihāraye;

avhānaṃ nābhinandeyya, abhihārañca gāmato.

716. “Na munī gāmamāgamma, kulesu sahasā care;

ghāsesanaṃ chinnakatho, na vācaṃ payutaṃ bhaṇe.

717. “Alatthaṃ yadidaṃ sādhu, nālatthaṃ kusalaṃ iti;

ubhayeneva so tādī, rukkhaṃvupanivattati [rukkhaṃvu’pativattati (ka.), rukkhaṃva upātivattati (syā.)].

718. “Sa pattapāṇi vicaranto, amūgo mūgasammato;

appaṃ dānaṃ na hīḷeyya, dātāraṃ nāvajāniyā.

719. “Uccāvacā hi paṭipadā, samaṇena pakāsitā;

na pāraṃ diguṇaṃ yanti, nayidaṃ ekaguṇaṃ mutaṃ.

720. “Yassa ca visatā natthi, chinnasotassa bhikkhuno;

kiccākiccappahīnassa, pariḷāho na vijjati.

721. “Moneyyaṃ te upaññissaṃ, khuradhārūpamo bhave;

jivhāya tālumāhacca, udare saññato siyā.

722. “Alīnacitto ca siyā, na cāpi bahu cintaye;

nirāmagandho asito, brahmacariyaparāyaṇo.

723. “Ekāsanassa sikkhetha, samaṇūpāsanassa ca;

ekattaṃ monamakkhātaṃ, eko ce abhiramissasi;
atha bhāhisi [bhāsihi (sī. syā. pī.)] dasadisā.

724. “Sutvā dhīrānaṃ nigghosaṃ, jhāyīnaṃ kāmacāginaṃ;

tato hiriñca saddhañca, bhiyyo kubbetha māmako.

725. “Taṃ nadīhi vijānātha, sobbhesu padaresu ca;

saṇantā yanti kusobbhā [kussubbhā (sī.)], tuṇhīyanti mahodadhī.

726. “Yadūnakaṃ taṃ saṇati, yaṃ pūraṃ santameva taṃ;

aḍḍhakumbhūpamo bālo, rahado pūrova paṇḍito.

727. “Yaṃ samaṇo bahuṃ bhāsati, upetaṃ atthasañhitaṃ;

jānaṃ so dhammaṃ deseti, jānaṃ so bahu bhāsati.

728. “Yo ca jānaṃ saṃyatatto, jānaṃ na bahu bhāsati;

sa munī monamarahati, sa munī monamajjhagā”ti.

Nālakasuttaṃ ekādasamaṃ niṭṭhitaṃ.