1. Ekakanipāto

1. Paṭhamavaggo

1. Subhūtittheragāthā

1. “Channā me kuṭikā sukhā nivātā, vassa deva yathāsukhaṃ;

cittaṃ me susamāhitaṃ vimuttaṃ, ātāpī viharāmi vassa devā”ti.

Itthaṃ sudaṃ [itthaṃ sumaṃ (ka. aṭṭha.)] āyasmā subhūtitthero gāthaṃ abhāsitthāti.

2. Mahākoṭṭhikattheragāthā

2. “Upasanto uparato, mantabhāṇī anuddhato;

dhunāti pāpake dhamme, dumapattaṃva māluto”ti.

Itthaṃ sudaṃ āyasmā mahākoṭṭhiko [mahākoṭṭhito (sī. syā.)] thero gāthaṃ abhāsitthāti.