5. Cakkhupālattheragāthā

95. “Andhohaṃ hatanettosmi, kantāraddhānapakkhando [pakkhanno (sī.), pakkanto (syā. sī. aṭṭha.)];

sayamānopi gacchissaṃ, na sahāyena pāpenā”ti.

… Cakkhupālo thero….

6. Khaṇḍasumanattheragāthā

96. “Ekapupphaṃ cajitvāna, asīti [asītiṃ (sī.)] vassakoṭiyo;

saggesu paricāretvā, sesakenamhi nibbuto”ti.

… Khaṇḍasumano thero….

7. Tissattheragāthā

97. “Hitvā satapalaṃ kaṃsaṃ, sovaṇṇaṃ satarājikaṃ;

aggahiṃ mattikāpattaṃ, idaṃ dutiyābhisecanan”ti.

… Tisso thero….