8. Abhayattheragāthā

98. “Rūpaṃ disvā sati muṭṭhā, piyaṃ nimittaṃ manasikaroto;

sārattacitto vedeti, tañca ajjhosa tiṭṭhati;
tassa vaḍḍhanti āsavā, bhavamūlopagāmino”ti [bhavamūlā bhavagāminoti (sī. ka.)].

… Abhayo thero….

9. Uttiyattheragāthā

99. “Saddaṃ sutvā sati muṭṭhā, piyaṃ nimittaṃ manasikaroto;

sārattacitto vedeti, tañca ajjhosa tiṭṭhati;
tassa vaḍḍhanti āsavā, saṃsāraṃ upagāmino”ti.

… Uttiyo thero….