5. Vītasokattheragāthā

169. “Kese me olikhissanti, kappako upasaṅkami;

tato ādāsamādāya, sarīraṃ paccavekkhisaṃ.

170. “Tuccho kāyo adissittha, andhakāro tamo byagā;

sabbe coḷā samucchinnā, natthi dāni punabbhavo”ti.

… Vītasoko thero….

6. Puṇṇamāsattheragāthā

171. “Pañca nīvaraṇe hitvā, yogakkhemassa pattiyā;

dhammādāsaṃ gahetvāna, ñāṇadassanamattano.

172. “Paccavekkhiṃ imaṃ kāyaṃ, sabbaṃ santarabāhiraṃ;

ajjhattañca bahiddhā ca, tuccho kāyo adissathā”ti.

… Puṇṇamāso thero….