6. Senakattheragāthā

287. “Svāgataṃ vata me āsi, gayāyaṃ gayaphagguyā;

yaṃ addasāsiṃ sambuddhaṃ, desentaṃ dhammamuttamaṃ.

288. “Mahappabhaṃ gaṇācariyaṃ, aggapattaṃ vināyakaṃ;

sadevakassa lokassa, jinaṃ atuladassanaṃ.

289. “Mahānāgaṃ mahāvīraṃ, mahājutimanāsavaṃ;

sabbāsavaparikkhīṇaṃ, satthāramakutobhayaṃ.

290. “Cirasaṃkiliṭṭhaṃ vata maṃ, diṭṭhisandānabandhitaṃ [sandhitaṃ (sī. syā.), sanditaṃ (pī. sī. aṭṭha.)];

vimocayi so bhagavā, sabbaganthehi senakan”ti.

… Senako thero….