15. Uttarātherīgāthā

15. “Kāyena saṃvutā āsiṃ, vācāya uda cetasā;

samūlaṃ taṇhamabbuyha, sītibhūtāmhi nibbutā”ti.

… Uttarā therī….

16. Vuḍḍhapabbajitasumanātherīgāthā

16. “Sukhaṃ tvaṃ vuḍḍhike sehi, katvā coḷena pārūtā;

upasanto hi te rāgo, sītibhūtāsi nibbutā”ti.

… Sumanā vuḍḍhapabbajitā therī….

17. Dhammātherīgāthā

17. “Piṇḍapātaṃ caritvāna, daṇḍamolubbha dubbalā;

vedhamānehi gattehi, tattheva nipatiṃ chamā;
disvā ādīnavaṃ kāye, atha cittaṃ vimucci me”ti.

… Dhammā therī….