10. Saparivārachattadāyakatthera-apadānaṃ

82. “Padumuttaro lokavidū, āhutīnaṃ paṭiggaho;

ākāse jalavuṭṭhīva vassate [vassati (sī. syā.), vasseti (?)] Dhammavuṭṭhiyā.

83. “Tamaddasāsiṃ sambuddhaṃ, desentaṃ amataṃ padaṃ;

sakaṃ cittaṃ pasādetvā, agamāsiṃ sakaṃ gharaṃ.

84. “Chattaṃ alaṅkataṃ gayha, upagacchiṃ naruttamaṃ;

haṭṭho haṭṭhena cittena, ākāse ukkhipiṃ ahaṃ.

85. “Susaṅgahitayānaṃva dantova sāvakuttamo;

upagantvāna sambuddhaṃ, matthake sampatiṭṭhahi.

86. “Anukampako kāruṇiko, buddho lokagganāyako;

bhikkhusaṅghe nisīditvā, imā gāthā abhāsatha.

87. “‘Yena chattamidaṃ dinnaṃ, alaṅkataṃ manoramaṃ;

tena cittappasādena, duggatiṃ so na gacchati.

88. “‘Sattakkhattuñca devesu, devarajjaṃ karissati;

bāttiṃsakkhattuñca rājā, cakkavattī bhavissati.

89. “‘Kappasatasahassamhi, okkākakulasambhavo;

gotamo nāma gottena, satthā loke bhavissati.

90. “‘Tassa dhammesu dāyādo, oraso dhammanimmito;

sabbāsave pariññāya, nibbāyissatināsavo’.

91. “Buddhassa giramaññāya, vācāsabhimudīritaṃ;

pasannacitto sumano, bhiyyo hāsaṃ janesahaṃ.

92. “Jahitvā mānusaṃ yoniṃ, dibbaṃ yoniṃ [devayoniṃ (sī.), dibbayoniṃ (syā.)] majjhagaṃ;

vimānamuttamaṃ mayhaṃ, abbhuggataṃ manoramaṃ.

93. “Vimānā nikkhamantassa, setacchattaṃ dharīyati;

tadā saññaṃ paṭilabhiṃ, pubbakammassidaṃ phalaṃ.

94. “Devalokā cavitvāna, manussattañca āgamiṃ;

chattiṃsakkhattuṃ cakkavattī, sattakappasatamhito.

95. “Tamhā kāyā cavitvāna, āgacchiṃ [agañchiṃ (?)] Tidasaṃ puraṃ;

saṃsaritvānupubbena, mānusaṃ punarāgamiṃ.

96. “Okkantaṃ mātukucchiṃ maṃ, settacchattaṃ adhārayuṃ;

jātiyā sattavassohaṃ, pabbajiṃ anagāriyaṃ.

97. “Sunando nāma nāmena, brāhmaṇo mantapāragū;

phalikaṃ chattamādāya, sāvakaggassa so tadā.

98. “Anumodi mahāvīro, sāriputto mahākathī;

sutvānumodanaṃ tassa, pubbakammamanussariṃ.

99. “Añjaliṃ paggahetvāna, sakaṃ cittaṃ pasādayiṃ;

saritvā purimaṃ kammaṃ, arahattamapāpuṇiṃ.

100. “Uṭṭhāya āsanā tamhā, sire katvāna añjaliṃ;

sambuddhaṃ abhivādetvā, imaṃ vācaṃ udīriyiṃ.

101. “Satasahassito kappe, buddho loke anuttaro;

padumuttaro lokavidū, āhutīnaṃ paṭiggaho.

102. “Tassa chattaṃ mayā dinnaṃ, vicittaṃ samalaṅkataṃ;

ubho hatthehi paggaṇhi, sayambhū aggapuggalo.

103. “Aho buddho aho dhammo, aho no satthusampadā;

ekacchattassa dānena, duggatiṃ nupapajjahaṃ.

104. “Kilesā jhāpitā mayhaṃ, bhavā sabbe samūhatā;

sabbāsave pariññāya, viharāmi anāsavo.

105. “Paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā saparivārachattadāyako thero imā gāthāyo abhāsitthāti;

saparivārachattadāyakattherassāpadānaṃ dasamaṃ;

umāpupphiyavaggo tettiṃsatimo;

tassuddānaṃ–

umāpupphañca pulinaṃ, hāso yañño nimittako;
saṃsāvako nigguṇḍī ca, sumanaṃ pupphachattako;
saparivārachatto ca, gāthā sattasatuttarāti.