4. Madhumaṃsadāyakatthera-apadānaṃ

106. “Nagare bandhumatiyā, sūkariko ahosahaṃ;

ukkoṭaṃ randhayitvāna [ukkoṭakaṃ randhayitvā (sī. syā.)], madhumaṃsamhi [madhusappimhi (pī.), madhuṃ maṃsamhi (ka.)] okiriṃ.

107. “Sannipātaṃ ahaṃ gantvā, ekaṃ pattaṃ gahesahaṃ;

pūrayitvāna taṃ pattaṃ, bhikkhusaṅghassadāsahaṃ.

108. “Yottha therataro bhikkhu, niyyādesi mamaṃ tadā;

iminā pattapūrena, labhassu vipulaṃ sukhaṃ.

109. “Duve sampattiyo bhutvā, sukkamūlena codito;

pacchime vattamānamhi, kilese jhāpayissati.

110. “Tattha cittaṃ pasādetvā, tāvatiṃsamagacchahaṃ;

tattha bhutvā pivitvā ca, labhāmi vipulaṃ sukhaṃ.

111. “Maṇḍape rukkhamūle vā, pubbakammaṃ anussariṃ;

annapānābhivasso me, abhivassati tāvade.

112. “Idaṃ pacchimakaṃ mayhaṃ, carimo vattate bhavo;

idhāpi annapānaṃ me, vassate sabbakālikaṃ.

113. “Teneva madhudānena [maṃsadānena (sī. pī.)], sandhāvitvā bhave ahaṃ;

sabbāsave pariññāya, viharāmi anāsavo.

114. “Ekanavutito kappe, yaṃ dānamadadiṃ tadā;

duggatiṃ nābhijānāmi, madhudānassidaṃ phalaṃ.

115. “Kilesā jhāpitā mayhaṃ…pe… viharāmi anāsavo;

116. “svāgataṃ vata me āsi…pe… kataṃ buddhassa sāsanaṃ;

117. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā madhumaṃsadāyako thero imā gāthāyo abhāsitthāti;

madhumaṃsadāyakattherassāpadānaṃ catutthaṃ;