8. Yāgudāyakatthera-apadānaṃ

149. “Atithiṃ [atītaṃ (ka.)] me gahetvāna, agacchiṃ gāmakaṃ tadā;

sampuṇṇanadikaṃ disvā, saṅghārāmaṃ upāgamiṃ.

150. “Āraññakā dhutadharā, jhāyino lūkhacīvarā;

vivekābhiratā dhīrā, saṅghārāme vasanti te.

151. “Gati tesaṃ upacchinnā, suvimuttāna tādinaṃ;

piṇḍāya te na gacchanti, oruddhanaditāya hi [oruddhanadikāyatiṃ (syā.)].

152. “Pasannacitto sumano, vedajāto katañjalī;

taṇḍulaṃ me gahetvāna, yāgudānaṃ adāsahaṃ.

153. “Pañcannaṃ yāguṃ datvāna, pasanno sehi pāṇibhi;

sakakammābhiraddhohaṃ, tāvatiṃsamagacchahaṃ.

154. “Maṇimayañca me byamhaṃ, nibbatti tidase gaṇe;

nārīgaṇehi sahito, modāmi byamhamuttame.

155. “Tettiṃsakkhattuṃ devindo, devarajjamakārayiṃ;

tiṃsakkhattuṃ cakkavattī, mahārajjamakārayiṃ.

156. “Padesarajjaṃ vipulaṃ, gaṇanāto asaṅkhiyaṃ;

devaloke manusse vā, anubhotvā sayaṃ [yasaṃ (syā.)] ahaṃ.

157. “Pacchime bhave sampatte, pabbajiṃ anagāriyaṃ;

saha oropite kese, sabbaṃ sampaṭivijjhahaṃ.

158. “Khayato vayato cāpi, sammasanto kaḷevaraṃ;

pure sikkhāpadādānā, arahattamapāpuṇiṃ.

159. “Sudinnaṃ me dānavaraṃ, vāṇijjaṃ sampayojitaṃ;

teneva yāgudānena, pattomhi acalaṃ padaṃ.

160. “Sokaṃ pariddavaṃ byādhiṃ, darathaṃ cittatāpanaṃ;

nābhijānāmi uppannaṃ, yāgudānassidaṃ phalaṃ.

161. “Yāguṃ saṅghassa datvāna, puññakkhette anuttare;

pañcānisaṃse anubhomi, aho yāgusuyiṭṭhatā.

162. “Abyādhitā rūpavatā, khippaṃ dhammanisantitā [nibujjhitā (syā.)];

lābhitā annapānassa, āyu pañcamakaṃ mama.

163. “Yo koci vedaṃ janayaṃ, saṅghe yāguṃ dadeyya so;

imāni pañca ṭhānāni, paṭigaṇheyya paṇḍito.

164. “Karaṇīyaṃ kataṃ sabbaṃ, bhavā ugghāṭitā mayā;

sabbāsavā parikkhīṇā, natthi dāni punabbhavo.

165. “So ahaṃ vicarissāmi, gāmā gāmaṃ purā puraṃ;

namassamāno sambuddhaṃ, dhammassa ca sudhammataṃ.

166. “Tiṃsakappasahassamhi, yaṃ dānamadadiṃ tadā;

duggatiṃ nābhijānāmi, yāgudānassidaṃ phalaṃ.

167. “Kilesā jhāpitā mayhaṃ…pe… viharāmi anāsavo;

168. “svāgataṃ vata me āsi…pe… kataṃ buddhassa sāsanaṃ;

169. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā yāgudāyako thero imā gāthāyo abhāsitthāti;

yāgudāyakattherassāpadānaṃ aṭṭhamaṃ;