9. Patthodanadāyakatthera-apadānaṃ

170. “Vanacārī pure āsiṃ, satataṃ vanakammiko;

patthodanaṃ gahetvāna, kammantaṃ agamāsahaṃ.

171. “Tatthaddasāsiṃ sambuddhaṃ, sayambhuṃ aparājitaṃ;

vanā piṇḍāya nikkhantaṃ, disvā cittaṃ pasādayiṃ.

172. “Parakammāyane [vayakammāyane (ka.)] yutto, puññañca me na vijjati;

ayaṃ patthodano atthi, bhojayissāmahaṃ [bhojayissāmi maṃ (syā.)] muniṃ.

173. “Patthodanaṃ gahetvāna, sayambhussa adāsahaṃ;

mama nijjhāyamānassa, paribhuñji tadā muni.

174. “Tena kammena sukatena, cetanāpaṇidhīhi ca;

jahitvā mānusaṃ dehaṃ, tāvatiṃsamagacchahaṃ.

175. “Chattiṃsakkhattuṃ devindo, devarajjamakārayiṃ;

tettiṃsakkhattuṃ rājā ca, cakkavattī ahosahaṃ.

176. “Padesarajjaṃ vipulaṃ, gaṇanāto asaṅkhiyaṃ;

sukhito yasavā homi, patthodanassidaṃ phalaṃ.

177. “Bhavābhave saṃsaranto, labhāmi amitaṃ dhanaṃ;

bhoge me ūnatā natthi, patthodanassidaṃ phalaṃ.

178. “Nadīsotapaṭibhāgā bhogā nibbattare mama;

parimetuṃ na sakkomi, patthodanassidaṃ phalaṃ.

179. “Imaṃ khāda imaṃ bhuñja, imamhi sayane saya;

tenāhaṃ sukhito homi, patthodanassidaṃ phalaṃ.

180. “Catunnavutito kappe, yaṃ dānamadadiṃ tadā;

duggatiṃ nābhijānāmi, patthodanassidaṃ phalaṃ.

181. “Kilesā jhāpitā mayhaṃ…pe… viharāmi anāsavo;

182. “svāgataṃ vata me āsi…pe… kataṃ buddhassa sāsanaṃ;

183. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā patthodanadāyako thero imā gāthāyo abhāsitthāti;

patthodanadāyakattherassāpadānaṃ navamaṃ;