10. Pesalātherī-apadānaṃ

220. “Imamhi bhaddake kappe, brahmabandhu mahāyaso;

kassapo nāma gottena, uppajji vadataṃ varo.

221. “Sāvatthiyaṃ pure vare, upāsakakule ahaṃ;

pasūtā taṃ [naṃ (syā.)] jinavaraṃ, disvā sutvā ca desanaṃ.

222. “Taṃ vīraṃ saraṇaṃ gantvā, sīlāni ca samādiyiṃ;

kadāci so mahāvīro, mahājanasamāgame.

223. “Attano abhisambodhiṃ, pakāsesi narāsabho;

ananussutadhammesu, pubbe dukkhādikesu ca.

224. “Cakkhu ñāṇañca paññā ca, vijjāloko ca āsi me;

taṃ sutvā uggahetvāna, paripucchiñca bhikkhavo.

225. “Tena kammena sukatena, cetanāpaṇidhīhi ca;

jahitvā mānusaṃ dehaṃ, tāvatiṃsamagacchahaṃ.

226. “Pacchime ca bhave dāni, jātā seṭṭhimahākule;

upecca buddhaṃ saddhammaṃ, sutvā saccūpasaṃhitaṃ.

227. “Pabbajitvācireneva, saccatthāni [sabbatthāni (syā. ka.)] vicintayaṃ;

khepetvā āsave sabbe, arahattamapāpuṇiṃ.

228. “Iddhīsu ca vasī homi, dibbāya sotadhātuyā;

cetopariyañāṇassa, vasī homi mahāmune.

229. “Pubbenivāsaṃ jānāmi, dibbacakkhu visodhitaṃ;

sabbāsavaparikkhīṇā, natthi dāni punabbhavo.

230. “Atthadhammaniruttīsu, paṭibhāne tatheva ca;

ñāṇaṃ me vimalaṃ suddhaṃ, buddhaseṭṭhassa vāhasā.

231. “Kilesā jhāpitā mayhaṃ, bhavā sabbe samūhatā;

nāgīva bandhanaṃ chetvā, viharāmi anāsavā.

232. “Svāgataṃ vata me āsi, mama buddhassa santike;

tisso vijjā anuppattā, kataṃ buddhassa sāsanaṃ.

233. “Paṭisambhidā catasso, vimokkhāpi ca aṭṭhime;

chaḷabhiññā sacchikatā, kataṃ buddhassa sāsanaṃ”.

Itthaṃ sudaṃ pesalā [selā (syā. pī.)] bhikkhunī imā gāthāyo abhāsitthāti.

Pesalātheriyāpadānaṃ dasamaṃ.

Khattiyāvaggo catuttho.

Tassuddānaṃ–

Khattiyā brāhmaṇī ceva, tathā uppaladāyikā;
siṅgālamātā sukkā ca, abhirūpā aḍḍhakāsikā.
Puṇṇā ca ambapālī ca, pesalāti ca tā dasa;
gāthāyo dvisatānettha, dvicattālīsa cuttari.

Atha vagguddānaṃ–

Sumedhā ekūposathā, kuṇḍalakesī khattiyā;
sahassaṃ tisatā gāthā, sattatālīsa piṇḍitā.
Saha uddānagāthāhi, gaṇitāyo vibhāvibhi;
sahassaṃ tisataṃ gāthā, sattapaññāsameva cāti.

Therikāpadānaṃ samattaṃ.

Apadānapāḷi samattā.