7. Sīhāsanikatthera-apadānaṃ

42. “Padumuttarassa bhagavato, sabbabhūtahitesino;

pasannacitto sumano, sīhāsanamadāsahaṃ.

43. “Devaloke manusse vā, yattha yattha vasāmahaṃ;

labhāmi vipulaṃ byamhaṃ, sīhāsanassidaṃ phalaṃ.

44. “Soṇṇamayā rūpimayā, lohitaṅgamayā [lohitaṅkamayā (sī. syā. pī.)] bahū;

maṇimayā ca pallaṅkā, nibbattanti mamaṃ sadā.

45. “Bodhiyā āsanaṃ katvā, jalajuttamanāmino;

ucce kule pajāyāmi, aho dhammasudhammatā.

46. “Satasahassito kappe, sīhāsanamakāsahaṃ;

duggatiṃ nābhijānāmi, sīhāsanassidaṃ phalaṃ.

47. “Kilesā jhāpitā mayhaṃ…pe… viharāmi anāsavo;

48. “svāgataṃ vata me āsi…pe… kataṃ buddhassa sāsanaṃ;

49. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā sīhāsaniko thero imā gāthāyo

abhāsitthāti;

sīhāsanikattherassāpadānaṃ sattamaṃ;