3. Ukkāsatikatthera-apadānaṃ

30. “Kosiko nāma bhagavā, cittakūṭe vasī tadā;

jhāyī jhānarato buddho, vivekābhirato muni.

31. “Ajjhogāhetvā [ajjhogahetvā (sī. syā. pī.)] himavantaṃ, nārīgaṇapurakkhato;

addasaṃ kosikaṃ buddhaṃ, puṇṇamāyeva candimaṃ.

32. “Ukkāsate gahetvāna, parivāresahaṃ tadā;

sattarattindivaṃ ṭhatvā [buddho (syā. ka.)], aṭṭhamena agacchahaṃ.

33. “Vuṭṭhitaṃ kosikaṃ buddhaṃ, sayambhuṃ aparājitaṃ;

pasannacitto vanditvā, ekaṃ bhikkhaṃ adāsahaṃ.

34. “Tena kammena dvipadinda, lokajeṭṭha narāsabha;

uppajjiṃ tusite kāye, ekabhikkhāyidaṃ phalaṃ.

35. “Divasañceva rattiñca, āloko hoti me sadā;

samantā yojanasataṃ, obhāsena pharāmahaṃ.

36. “Pañcapaññāsakappamhi, cakkavattī ahosahaṃ;

cāturanto vijitāvī, jambumaṇḍassa [jambusaṇḍassa (pī.)] issaro.

37. “Tadā me nagaraṃ āsi, iddhaṃ phītaṃ sunimmitaṃ;

tiṃsayojanamāyāmaṃ, vitthārena ca vīsati.

38. “Sobhaṇaṃ nāma nagaraṃ, vissakammena māpitaṃ;

dasasaddāvivittaṃ taṃ, sammatāḷasamāhitaṃ.

39. “Na tamhi nagare atthi, vallikaṭṭhañca mattikā;

sabbasoṇṇamayaṃyeva, jotate niccakālikaṃ.

40. “Catupākāraparikkhittaṃ, tayo āsuṃ maṇimayā;

vemajjhe tālapantī ca, vissakammena māpitā.

41. “Dasasahassapokkharañño, padumuppalachāditā;

puṇḍarīkehi [puṇḍarīkādi (syā.)] sañchannā, nānāgandhasamīritā.

42. “Catunnavutito kappe, yaṃ ukkaṃ dhārayiṃ ahaṃ;

duggatiṃ nābhijānāmi, ukkadhārassidaṃ phalaṃ.

43. “Kilesā jhāpitā mayhaṃ…pe… viharāmi anāsavo;

44. “svāgataṃ vata me āsi…pe… kataṃ buddhassa sāsanaṃ;

45. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā ukkāsatiko thero imā gāthāyo

abhāsitthāti;

ukkāsatikattherassāpadānaṃ tatiyaṃ;