6. Ghatamaṇḍadāyakatthera-apadānaṃ

41. “Sucintitaṃ bhagavantaṃ, lokajeṭṭhaṃ narāsabhaṃ;

upaviṭṭhaṃ mahāraññaṃ, vātābādhena pīḷitaṃ.

42. “Disvā cittaṃ pasādetvā, ghatamaṇḍamupānayiṃ;

katattā ācitattā [upacitattā (syā. ka.)] ca, gaṅgā bhāgīrathī ayaṃ.

43. “Mahāsamuddā cattāro, ghataṃ sampajjare mama;

ayañca pathavī ghorā, appamāṇā asaṅkhiyā.

44. “Mama saṅkappamaññāya, bhavate madhusakkarā [madhusakkharā (syā. ka.)];

cātuddīpā ime rukkhā, pādapā dharaṇīruhā.

45. “Mama saṅkappamaññāya, kapparukkhā bhavanti te;

paññāsakkhattuṃ devindo, devarajjamakārayiṃ.

46. “Ekapaññāsakkhattuñca, cakkavattī ahosahaṃ;

padesarajjaṃ vipulaṃ, gaṇanāto asaṅkhiyaṃ.

47. “Catunnavutito [chanavute ito (sī.)] kappe, yaṃ dānamadadiṃ tadā;

duggatiṃ nābhijānāmi, ghatamaṇḍassidaṃ phalaṃ.

48. “Kilesā jhāpitā mayhaṃ…pe… viharāmi anāsavo;

49. “svāgataṃ vata me āsi…pe… kataṃ buddhassa sāsanaṃ;

50. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā ghatamaṇḍadāyako thero imā gāthāyo

abhāsitthāti;

ghatamaṇḍadāyakattherassāpadānaṃ chaṭṭhaṃ;