3. Mahāvaggo

1. Pabbajjāsuttaṃ

407. Pabbajjaṃ kittayissāmi, yathā pabbaji cakkhumā;

yathā vīmaṃsamāno so, pabbajjaṃ samarocayi.

408. Sambādhoyaṃ gharāvāso, rajassāyatanaṃ iti;

abbhokāsova pabbajjā, iti disvāna pabbaji.

409. Pabbajitvāna kāyena, pāpakammaṃ vivajjayi;

vacīduccaritaṃ hitvā, ājīvaṃ parisodhayi.

410. Agamā rājagahaṃ buddho, magadhānaṃ giribbajaṃ;

piṇḍāya abhihāresi, ākiṇṇavaralakkhaṇo.

411. Tamaddasā bimbisāro, pāsādasmiṃ patiṭṭhito;

disvā lakkhaṇasampannaṃ, imamatthaṃ abhāsatha.

412. “Imaṃ bhonto nisāmetha, abhirūpo brahā suci;

caraṇena ca sampanno, yugamattañca pekkhati.

413. “Okkhittacakkhu satimā, nāyaṃ nīcakulāmiva;

rājadūtābhidhāvantu, kuhiṃ bhikkhu gamissati”.

414. Te pesitā rājadūtā, piṭṭhito anubandhisuṃ;

kuhiṃ gamissati bhikkhu, kattha vāso bhavissati.

415. Sapadānaṃ caramāno, guttadvāro susaṃvuto;

khippaṃ pattaṃ apūresi, sampajāno paṭissato.

416. Piṇḍacāraṃ caritvāna, nikkhamma nagarā muni;

paṇḍavaṃ abhihāresi, ettha vāso bhavissati.

417. Disvāna vāsūpagataṃ, tayo [tato (sī. pī.)] dūtā upāvisuṃ;

tesu ekova [eko ca dūto (sī. syā. pī.)] āgantvā, rājino paṭivedayi.

418. “Esa bhikkhu mahārāja, paṇḍavassa puratthato [purakkhato (syā. ka.)];

nisinno byagghusabhova, sīhova girigabbhare”.

419. Sutvāna dūtavacanaṃ, bhaddayānena khattiyo;

taramānarūpo niyyāsi, yena paṇḍavapabbato.

420. Sa yānabhūmiṃ yāyitvā, yānā oruyha khattiyo;

pattiko upasaṅkamma, āsajja naṃ upāvisi.

421. Nisajja rājā sammodi, kathaṃ sāraṇīyaṃ tato;

kathaṃ so vītisāretvā, imamatthaṃ abhāsatha.

422. “Yuvā ca daharo cāsi, paṭhamuppattiko [paṭhamuppattiyā (sī.), paṭhamuppattito (syā.)] susu;

vaṇṇārohena sampanno, jātimā viya khattiyo.

423. “Sobhayanto anīkaggaṃ, nāgasaṅghapurakkhato;

dadāmi bhoge bhuñjassu, jātiṃ akkhāhi pucchito”.

424. “Ujuṃ janapado rāja, himavantassa passato;

dhanavīriyena sampanno, kosalesu [kosalassa (syā. ka.)] niketino.

425. “Ādiccā [ādicco (ka.)] nāma gottena, sākiyā [sākiyo (ka.)] nāma jātiyā;

tamhā kulā pabbajitomhi, na kāme abhipatthayaṃ.

426. “Kāmesvādīnavaṃ disvā, nekkhammaṃ daṭṭhu khemato;

padhānāya gamissāmi, ettha me rañjatī mano”ti.

Pabbajjāsuttaṃ paṭhamaṃ niṭṭhitaṃ.