3. Duṭṭhaṭṭhakasuttaṃ

786. Vadanti ve duṭṭhamanāpi eke, athopi ve saccamanā vadanti;

vādañca jātaṃ muni no upeti, tasmā munī natthi khilo kuhiñci.

787. Sakañhi diṭṭhiṃ kathamaccayeyya, chandānunīto ruciyā niviṭṭho;

sayaṃ samattāni pakubbamāno, yathā hi jāneyya tathā vadeyya.

788. Yo attano sīlavatāni jantu, anānupuṭṭhova paresa [parassa (ka.)] pāva [pāvā (sī. syā. pī.)];

anariyadhammaṃ kusalā tamāhu, yo ātumānaṃ sayameva pāva.

789. Santo ca bhikkhu abhinibbutatto, itihanti sīlesu akatthamāno;

tamariyadhammaṃ kusalā vadanti, yassussadā natthi kuhiñci loke.

790. Pakappitā saṅkhatā yassa dhammā, purakkhatā [purekkhatā (sī.)] santi avīvadātā;

yadattani passati ānisaṃsaṃ, taṃ nissito kuppapaṭicca santiṃ.

791. Diṭṭhīnivesā na hi svātivattā, dhammesu niccheyya samuggahītaṃ;

tasmā naro tesu nivesanesu, nirassatī ādiyatī ca dhammaṃ.

792. Dhonassa hi natthi kuhiñci loke, pakappitā diṭṭhi bhavābhavesu;

māyañca mānañca pahāya dhono, sa kena gaccheyya anūpayo so.

793. Upayo hi dhammesu upeti vādaṃ, anūpayaṃ kena kathaṃ vadeyya;

attā nirattā [attaṃ nirattaṃ (bahūsu)] na hi tassa atthi, adhosi so diṭṭhimidheva sabbanti.

Duṭṭhaṭṭhakasuttaṃ tatiyaṃ niṭṭhitaṃ.