10. Purābhedasuttaṃ

854. “Kathaṃdassī kathaṃsīlo, upasantoti vuccati;

taṃ me gotama pabrūhi, pucchito uttamaṃ naraṃ”.

855. “Vītataṇho purā bhedā, (iti bhagavā) pubbamantamanissito;

vemajjhe nupasaṅkheyyo, tassa natthi purakkhataṃ.

856. “Akkodhano asantāsī, avikatthī akukkuco;

mantabhāṇī [mantābhāṇī (syā. pī.)] anuddhato, sa ve vācāyato muni.

857. “Nirāsatti anāgate, atītaṃ nānusocati;

vivekadassī phassesu, diṭṭhīsu ca na nīyati [niyyati (bahūsu)].

858. “Patilīno akuhako, apihālu amaccharī;

appagabbho ajeguccho, pesuṇeyye ca no yuto.

859. “Sātiyesu anassāvī, atimāne ca no yuto;

saṇho ca paṭibhānavā [paṭibhāṇavā (syā. pī.)], na saddho na virajjati.

860. “Lābhakamyā na sikkhati, alābhe ca na kuppati;

aviruddho ca taṇhāya, rasesu nānugijjhati.

861. “Upekkhako sadā sato, na loke maññate samaṃ;

na visesī na nīceyyo, tassa no santi ussadā.

862. “Yassa nissayanā [nissayatā (sī. syā. pī.)] natthi, ñatvā dhammaṃ anissito;

bhavāya vibhavāya vā, taṇhā yassa na vijjati.

863. “Taṃ brūmi upasantoti, kāmesu anapekkhinaṃ;

ganthā tassa na vijjanti, atarī so visattikaṃ.

864. “Na tassa puttā pasavo, khettaṃ vatthuñca vijjati;

attā vāpi nirattā vā [attaṃ vāpi nirattaṃ vā (bahūsu)], na tasmiṃ upalabbhati.

865. “Yena naṃ vajjuṃ puthujjanā, atho samaṇabrāhmaṇā;

taṃ tassa apurakkhataṃ, tasmā vādesu nejati.

866. “Vītagedho amaccharī, na ussesu vadate muni;

na samesu na omesu, kappaṃ neti akappiyo.

867. “Yassa loke sakaṃ natthi, asatā ca na socati;

dhammesu ca na gacchati, sa ve santoti vuccatī”ti.

Purābhedasuttaṃ dasamaṃ niṭṭhitaṃ.