7. Uposathāvimānavatthu

229. “Abhikkantena vaṇṇena, yā tvaṃ tiṭṭhasi devate;

obhāsentī disā sabbā, osadhī viya tārakā.

230. “Kena tetādiso vaṇṇo…pe…

vaṇṇo ca te sabbadisā pabhāsatī”ti.

232. Sā devatā attamanā…pe… yassa kammassidaṃ phalaṃ;

233. “uposathāti maṃ aññaṃsu, sāketāyaṃ upāsikā;

saddhā sīlena sampannā, saṃvibhāgaratā sadā.

234. “Acchādanañca bhattañca, senāsanaṃ padīpiyaṃ;

adāsiṃ ujubhūtesu, vippasannena cetasā.

235. “Cātuddasiṃ pañcadasiṃ, yā ca pakkhassa aṭṭhamī;

pāṭihāriyapakkhañca, aṭṭhaṅgasusamāgataṃ.

236. “Uposathaṃ upavasissaṃ, sadā sīlesu saṃvutā;

saññamā saṃvibhāgā ca, vimānaṃ āvasāmahaṃ.

237. “Pāṇātipātā viratā, musāvādā ca saññatā;

theyyā ca aticārā ca, majjapānā ca ārakā.

238. “Pañcasikkhāpade ratā, ariyasaccāna kovidā;

upāsikā cakkhumato, gotamassa yasassino.

239. “Tena metādiso vaṇṇo…pe…

vaṇṇo ca me sabbadisā pabhāsatī”ti.

241. “Abhikkhaṇaṃ nandanaṃ sutvā, chando me udapajjatha [upapajjatha (bahūsu)];

tattha cittaṃ paṇidhāya, upapannamhi nandanaṃ.

242. “Nākāsiṃ satthu vacanaṃ, buddhassādiccabandhuno;

hīne cittaṃ paṇidhāya, sāmhi pacchānutāpinī”ti.

243. “Kīva ciraṃ vimānamhi, idha vacchasuposathe [vassasuposathe (sī.)];

devate pucchitācikkha, yadi jānāsi āyuno”ti.

244. “Saṭṭhivassasahassāni [saṭṭhi satasahassāni (?)], Tisso ca vassakoṭiyo;

idha ṭhatvā mahāmuni, ito cutā gamissāmi;
manussānaṃ sahabyatan”ti.

245. “Mā tvaṃ uposathe bhāyi, sambuddhenāsi byākatā;

sotāpannā visesayi, pahīnā tava duggatī”ti.

Uposathāvimānaṃ sattamaṃ.