8. Mallikāvimānavatthu

658. “Pītavatthe pītadhaje, pītālaṅkārabhūsite;

pītantarāhi vaggūhi, apiḷandhāva sobhasi.

659. “Kā kambukāyūradhare [kakambukāyuradhare (syā.)], kañcanāveḷabhūsite;

hemajālakasañchanne [pacchanne (sī.)], nānāratanamālinī.

660. “Sovaṇṇamayā lohitaṅgamayā [lohitaṅkamayā (sī. syā.)] ca, muttāmayā veḷuriyamayā ca;

masāragallā sahalohitaṅgā [sahalohitaṅkā (sī.), sahalohitakā (syā.)], pārevatakkhīhi maṇīhi cittatā.

661. “Koci koci ettha mayūrasussaro, haṃsassa rañño karavīkasussaro;

tesaṃ saro suyyati vaggurūpo, pañcaṅgikaṃ tūriyamivappavāditaṃ.

662. “Ratho ca te subho vaggu [vaggū (syā.)], nānāratanacittito [nānāratanacittaṅgo (syā.)];

nānāvaṇṇāhi dhātūhi, suvibhattova sobhati.

663. “Tasmiṃ rathe kañcanabimbavaṇṇe, yā tvaṃ [yattha (ka. sī. syā. ka.)] ṭhitā bhāsasi maṃ padesaṃ;

devate pucchitācikkha, kissa kammassidaṃ phalan”ti.

664. “Sovaṇṇajālaṃ maṇisoṇṇacittitaṃ [vicittaṃ (ka.), cittaṃ (sī. syā.)], muttācitaṃ hemajālena channaṃ [sañchannaṃ (ka.)];

parinibbute gotame appameyye, pasannacittā ahamābhiropayiṃ.

665. “Tāhaṃ kammaṃ karitvāna, kusalaṃ buddhavaṇṇitaṃ;

apetasokā sukhitā, sampamodāmanāmayā”ti.

Mallikāvimānaṃ aṭṭhamaṃ.