8. Anekavaṇṇavimānavatthu

1199. “Anekavaṇṇaṃ darasokanāsanaṃ, vimānamāruyha anekacittaṃ;

parivārito accharāsaṅgaṇena, sunimmito bhūtapatīva modasi.

1200. “Samassamo natthi kuto panuttaro [uttari (ka.)], yasena puññena ca iddhiyā ca;

sabbe ca devā tidasagaṇā samecca, taṃ taṃ namassanti sasiṃva devā;
imā ca te accharāyo samantato, naccanti gāyanti pamodayanti.

1201. “Deviddhipattosi mahānubhāvo, manussabhūto kimakāsi puññaṃ;

kenāsi evaṃ jalitānubhāvo, vaṇṇo ca te sabbadisā pabhāsatī”ti.

1202. So devaputto attamano…pe… yassa kammassidaṃ phalaṃ;

1203. “ahaṃ bhadante ahuvāsi pubbe, sumedhanāmassa jinassa sāvako;

puthujjano ananubodhohamasmi [anavabodhohamasmiṃ (sī.), ananubodhohamāsiṃ (?)], So satta vassāni paribbajissahaṃ [pabbajissahaṃ (syā. ka.), pabbajisāhaṃ (pī.)].

1204. “Sohaṃ sumedhassa jinassa satthuno, parinibbutassoghatiṇṇassa tādino;

ratanuccayaṃ hemajālena channaṃ, vanditvā thūpasmiṃ manaṃ pasādayiṃ.

1205. “Na māsi dānaṃ na ca matthi dātuṃ, pare ca kho tattha samādapesiṃ;

pūjetha naṃ pūjanīyassa [pūjaneyyassa (syā. ka.)] dhātuṃ, evaṃ kira saggamito gamissatha.

1206. “Tadeva kammaṃ kusalaṃ kataṃ mayā, sukhañca dibbaṃ anubhomi attanā;

modāmahaṃ tidasagaṇassa majjhe, na tassa puññassa khayampi ajjhagan”ti.

Anekavaṇṇavimānaṃ aṭṭhamaṃ.