2. Tekicchakārittheragāthā

381. “Atihitā vīhi, khalagatā sālī;

na ca labhe piṇḍaṃ, kathamahaṃ kassaṃ.

382. “Buddhamappameyyaṃ anussara pasanno;

pītiyā phuṭasarīro hohisi satatamudaggo.

383. “Dhammamappameyyaṃ anussara pasanno;

pītiyā phuṭasarīro hohisi satatamudaggo.

384. “Saṅghamappameyyaṃ anussara pasanno;

pītiyā phuṭasarīro hohisi satatamudaggo.

385. “Abbhokāse viharasi, sītā hemantikā imā ratyo;

mā sītena pareto vihaññittho, pavisa tvaṃ vihāraṃ phusitaggaḷaṃ.

386. “Phusissaṃ catasso appamaññāyo, tāhi ca sukhito viharissaṃ;

nāhaṃ sītena vihaññissaṃ, aniñjito viharanto”ti.

… Tekicchakārī [tekicchakāni (sī. syā. pī.)] thero….