3. Bhaddattheragāthā

473. “Ekaputto ahaṃ āsiṃ, piyo mātu piyo pitu;

bahūhi vatacariyāhi, laddho āyācanāhi ca.

474. “Te ca maṃ anukampāya, atthakāmā hitesino;

ubho pitā ca mātā ca, buddhassa upanāmayuṃ”.

475. “Kicchā laddho ayaṃ putto, sukhumālo sukhedhito;

imaṃ dadāma te nātha, jinassa paricārakaṃ”.

476. “Satthā ca maṃ paṭiggayha, ānandaṃ etadabravi;

‘pabbājehi imaṃ khippaṃ, hessatyājāniyo ayaṃ.

477. “Pabbājetvāna maṃ satthā, vihāraṃ pāvisī jino;

anoggatasmiṃ sūriyasmiṃ, tato cittaṃ vimucci me.

478. “Tato satthā nirākatvā, paṭisallānavuṭṭhito;

‘ehi bhaddā’ti maṃ āha, sā me āsūpasampadā.

479. “Jātiyā sattavassena, laddhā me upasampadā;

tisso vijjā anuppattā, aho dhammasudhammatā”ti.

… Bhaddo thero….