2. Udāyittheragāthā

689. [A. ni. 6.43] “manussabhūtaṃ sambuddhaṃ, attadantaṃ samāhitaṃ;

iriyamānaṃ brahmapathe, cittassūpasame rataṃ.

690. “Yaṃ manussā namassanti, sabbadhammāna pāraguṃ;

devāpi taṃ namassanti, iti me arahato sutaṃ.

691. “Sabbasaṃyojanātītaṃ vanā nibbanamāgataṃ;

kāmehi nekkhammarataṃ [nikkhammarataṃ (ka.)], muttaṃ selāva kañcanaṃ.

692. “Sa ve accaruci nāgo, himavāvaññe siluccaye;

sabbesaṃ nāganāmānaṃ, saccanāmo anuttaro.

693. “Nāgaṃ vo kittayissāmi, na hi āguṃ karoti so;

soraccaṃ avihiṃsā ca, pādā nāgassa te duve.

694. “Sati ca sampajaññañca, caraṇā nāgassa tepare;

saddhāhattho mahānāgo, upekkhāsetadantavā.

695. “Sati gīvā siro paññā, vīmaṃsā dhammacintanā;

dhammakucchisamāvāso, viveko tassa vāladhi.

696. “So jhāyī assāsarato, ajjhattaṃ susamāhito;

gacchaṃ samāhito nāgo, ṭhito nāgo samāhito.

697. “Sayaṃ samāhito nāgo, nisinnopi samāhito;

sabbattha saṃvuto nāgo, esā nāgassa sampadā.

698. “Bhuñjati anavajjāni, sāvajjāni na bhuñjati;

ghāsamacchādanaṃ laddhā, sannidhiṃ parivajjayaṃ.

699. “Saṃyojanaṃ aṇuṃ thūlaṃ, sabbaṃ chetvāna bandhanaṃ;

yena yeneva gacchati, anapakkhova gacchati.

700. “Yathāpi udake jātaṃ, puṇḍarīkaṃ pavaḍḍhati;

nopalippati toyena, sucigandhaṃ manoramaṃ.

701. “Tatheva ca loke jāto, buddho loke viharati;

nopalippati lokena, toyena padumaṃ yathā.

702. “Mahāgini pajjalito, anāhāropasammati;

aṅgāresu ca santesu, nibbutoti pavuccati.

703. “Atthassāyaṃ viññāpanī, upamā viññūhi desitā;

viññissanti mahānāgā, nāgaṃ nāgena desitaṃ.

704. “Vītarāgo vītadoso, vītamoho anāsavo;

sarīraṃ vijahaṃ nāgo, parinibbissatyanāsavo”ti.

… Udāyī thero….

Soḷasakanipāto niṭṭhito.

Tatruddānaṃ–

Koṇḍañño ca udāyī ca, therā dve te mahiddhikā;
soḷasamhi nipātamhi, gāthāyo dve ca tiṃsa cāti.