16. Vīsatinipāto

1. Adhimuttattheragāthā

705. “Yaññatthaṃ vā dhanatthaṃ vā, ye hanāma mayaṃ pure;

avasesaṃ [avase taṃ (sī. aṭṭha. mūlapāṭho), avasesānaṃ (aṭṭha.?)] Bhayaṃ hoti, vedhanti vilapanti ca.

706. “Tassa te natthi bhītattaṃ, bhiyyo vaṇṇo pasīdati;

kasmā na paridevesi, evarūpe mahabbhaye.

707. “Natthi cetasikaṃ dukkhaṃ, anapekkhassa gāmaṇi;

atikkantā bhayā sabbe, khīṇasaṃyojanassa ve.

708. “Khīṇāya bhavanettiyā, diṭṭhe dhamme yathātathe;

na bhayaṃ maraṇe hoti, bhāranikkhepane yathā.

709. “Suciṇṇaṃ brahmacariyaṃ me, maggo cāpi subhāvito;

maraṇe me bhayaṃ natthi, rogānamiva saṅkhaye.

710. “Suciṇṇaṃ brahmacariyaṃ me, maggo cāpi subhāvito;

nirassādā bhavā diṭṭhā, visaṃ pitvāva [pītvāva (sī.)] chaḍḍitaṃ.

711. “Pāragū anupādāno, katakicco anāsavo;

tuṭṭho āyukkhayā hoti, mutto āghātanā yathā.

712. “Uttamaṃ dhammataṃ patto, sabbaloke anatthiko;

ādittāva gharā mutto, maraṇasmiṃ na socati.

713. “Yadatthi saṅgataṃ kiñci, bhavo vā yattha labbhati;

sabbaṃ anissaraṃ etaṃ, iti vuttaṃ mahesinā.

714. “Yo taṃ tathā pajānāti, yathā buddhena desitaṃ;

na gaṇhāti bhavaṃ kiñci, sutattaṃva ayoguḷaṃ.

715. “Na me hoti ‘ahosin’ti, ‘bhavissan’ti na hoti me;

saṅkhārā vigamissanti, tattha kā paridevanā.

716. “Suddhaṃ dhammasamuppādaṃ, suddhaṃ saṅkhārasantatiṃ;

passantassa yathābhūtaṃ, na bhayaṃ hoti gāmaṇi.

717. “Tiṇakaṭṭhasamaṃ lokaṃ, yadā paññāya passati;

mamattaṃ so asaṃvindaṃ, ‘natthi me’ti na socati.

718. “Ukkaṇṭhāmi sarīrena, bhavenamhi anatthiko;

soyaṃ bhijjissati kāyo, añño ca na bhavissati.

719. “Yaṃ vo kiccaṃ sarīrena, taṃ karotha yadicchatha;

na me tappaccayā tattha, doso pemañca hehiti”.

720. Tassa taṃ vacanaṃ sutvā, abbhutaṃ lomahaṃsanaṃ;

satthāni nikkhipitvāna, māṇavā etadabravuṃ.

721. “Kiṃ bhadante karitvāna, ko vā ācariyo tava;

kassa sāsanamāgamma, labbhate taṃ asokatā”.

722. “Sabbaññū sabbadassāvī, jino ācariyo mama;

mahākāruṇiko satthā, sabbalokatikicchako.

723. “Tenāyaṃ desito dhammo, khayagāmī anuttaro;

tassa sāsanamāgamma, labbhate taṃ asokatā”.

724. Sutvāna corā isino subhāsitaṃ, nikkhippa satthāni ca āvudhāni ca;

tamhā ca kammā viramiṃsu eke, eke ca pabbajjamarocayiṃsu.

725. Te pabbajitvā sugatassa sāsane, bhāvetva bojjhaṅgabalāni paṇḍitā;

udaggacittā sumanā katindriyā, phusiṃsu nibbānapadaṃ asaṅkhatanti.

…Adhimutto thero….