10. Pārāpariyattheragāthā

920. Samaṇassa ahu cintā, pupphitamhi mahāvane;

ekaggassa nisinnassa, pavivittassa jhāyino.

921. “Aññathā lokanāthamhi, tiṭṭhante purisuttame;

iriyaṃ āsi bhikkhūnaṃ, aññathā dāni dissati.

922. “Sītavātaparittānaṃ, hirikopīnachādanaṃ;

mattaṭṭhiyaṃ abhuñjiṃsu, santuṭṭhā itarītare.

923. “Paṇītaṃ yadi vā lūkhaṃ, appaṃ vā yadi vā bahuṃ;

yāpanatthaṃ abhuñjiṃsu, agiddhā nādhimucchitā.

924. “Jīvitānaṃ parikkhāre, bhesajje atha paccaye;

na bāḷhaṃ ussukā āsuṃ, yathā te āsavakkhaye.

925. “Araññe rukkhamūlesu, kandarāsu guhāsu ca;

vivekamanubrūhantā, vihaṃsu tapparāyanā.

926. “Nīcā niviṭṭhā subharā, mudū atthaddhamānasā;

abyāsekā amukharā, atthacintā vasānugā.

927. “Tato pāsādikaṃ āsi, gataṃ bhuttaṃ nisevitaṃ;

siniddhā teladhārāva, ahosi iriyāpatho.

928. “Sabbāsavaparikkhīṇā, mahājhāyī mahāhitā;

nibbutā dāni te therā, parittā dāni tādisā.

929. “Kusalānañca dhammānaṃ, paññāya ca parikkhayā;

sabbākāravarūpetaṃ, lujjate jinasāsanaṃ.

930. “Pāpakānañca dhammānaṃ, kilesānañca yo utu;

upaṭṭhitā vivekāya, ye ca saddhammasesakā.

931. “Te kilesā pavaḍḍhantā, āvisanti bahuṃ janaṃ;

kīḷanti maññe bālehi, ummattehiva rakkhasā.

932. “Kilesehābhibhūtā te, tena tena vidhāvitā;

narā kilesavatthūsu, sasaṅgāmeva ghosite.

933. “Pariccajitvā saddhammaṃ, aññamaññehi bhaṇḍare;

diṭṭhigatāni anventā, idaṃ seyyoti maññare;

934. “dhanañca puttaṃ bhariyañca, chaḍḍayitvāna niggatā;

kaṭacchubhikkhahetūpi, akicchāni nisevare;

935. “udarāvadehakaṃ bhutvā, sayantuttānaseyyakā;

kathaṃ vattenti [kathā vaḍḍhenti (sī. ka.)] paṭibuddhā, yā kathā satthugarahitā;

936. “sabbakārukasippāni cittiṃ katvāna [cittīkatvāna (sī.), cittaṃ katvāna (syā.)] sikkhare;

avūpasantā ajjhattaṃ, sāmaññatthoti acchati [tiriñcati (?)].

937. “Mattikaṃ telacuṇṇañca, udakāsanabhojanaṃ;

gihīnaṃ upanāmenti, ākaṅkhantā bahuttaraṃ.

938. “Dantaponaṃ kapitthañca, pupphaṃ khādaniyāni ca;

piṇḍapāte ca sampanne, ambe āmalakāni ca.

939. “Bhesajjesu yathā vejjā, kiccākicce yathā gihī;

gaṇikāva vibhūsāyaṃ, issare khattiyā yathā.

940. “Nekatikā vañcanikā, kūṭasakkhī apāṭukā;

bahūhi parikappehi, āmisaṃ paribhuñjare.

941. “Lesakappe pariyāye, parikappenudhāvitā;

jīvikatthā upāyena, saṅkaḍḍhanti bahuṃ dhanaṃ.

942. “Upaṭṭhāpenti parisaṃ, kammato no ca dhammato;

dhammaṃ paresaṃ desenti, lābhato no ca atthato.

943. “Saṅghalābhassa bhaṇḍanti, saṅghato paribāhirā;

paralābhopajīvantā, ahirīkā na lajjare.

944. “Nānuyuttā tathā eke, muṇḍā saṅghāṭipārutā;

sambhāvanaṃyevicchanti, lābhasakkāramucchitā.

945. “Evaṃ nānappayātamhi, na dāni sukaraṃ tathā;

aphusitaṃ vā phusituṃ, phusitaṃ vānurakkhituṃ.

946. “Yathā kaṇṭakaṭṭhānamhi, careyya anupāhano;

satiṃ upaṭṭhapetvāna, evaṃ gāme munī care.

947. “Saritvā pubbake yogī, tesaṃ vattamanussaraṃ;

kiñcāpi pacchimo kālo, phuseyya amataṃ padaṃ.

948. “Idaṃ vatvā sālavane, samaṇo bhāvitindriyo;

brāhmaṇo parinibbāyī, isi khīṇapunabbhavo”ti.

… Pārāpariyo [pārāsariyo (syā.)] thero….

Vīsatinipāto niṭṭhito.

Tatruddānaṃ–

Adhimutto pārāpariyo, telakāni raṭṭhapālo;
mālukyaselo bhaddiyo, aṅguli dibbacakkhuko.
Pārāpariyo dasete, vīsamhi parikittitā;
gāthāyo dve satā honti, pañcatālīsa [244 gāthāyoyeva dissanti] uttarinti.