6. Khujjasobhitattheragāthā

234. “Ye cittakathī bahussutā, samaṇā pāṭaliputtavāsino;

tesaññataroyamāyuvā, dvāre tiṭṭhati khujjasobhito.

235. “Ye cittakathī bahussutā, samaṇā pāṭaliputtavāsino;

tesaññataroyamāyuvā, dvāre tiṭṭhati māluterito.

236. “Suyuddhena suyiṭṭhena, saṅgāmavijayena ca;

brahmacariyānuciṇṇena, evāyaṃ sukhamedhatī”ti.

… Khujjasobhito thero….

7. Vāraṇattheragāthā

237. “Yodha koci manussesu, parapāṇāni hiṃsati;

asmā lokā paramhā ca, ubhayā dhaṃsate naro.

238. “Yo ca mettena cittena, sabbapāṇānukampati;

bahuñhi so pasavati, puññaṃ tādisako naro.

239. “Subhāsitassa sikkhetha, samaṇūpāsanassa ca;

ekāsanassa ca raho, cittavūpasamassa cā”ti.

… Vāraṇo thero….