3. Aparā-uttamātherīgāthā

45. “Ye ime satta bojjhaṅgā, maggā nibbānapattiyā;

bhāvitā te mayā sabbe, yathā buddhena desitā.

46. “Suññatassānimittassa, lābhinīhaṃ yadicchakaṃ;

orasā dhītā buddhassa, nibbānābhiratā sadā.

47. “Sabbe kāmā samucchinnā, ye dibbā ye ca mānusā;

vikkhīṇo jātisaṃsāro, natthi dāni punabbhavo”ti.

… Aparā uttamā therī….

4. Dantikātherīgāthā

48. “Divāvihārā nikkhamma, gijjhakūṭamhi pabbate;

nāgaṃ ogāhamuttiṇṇaṃ, nadītīramhi addasaṃ.

49. “Puriso aṅkusamādāya, ‘dehi pādan’ti yācati;

nāgo pasārayī pādaṃ, puriso nāgamāruhi.

50. “Disvā adantaṃ damitaṃ, manussānaṃ vasaṃ gataṃ;

tato cittaṃ samādhesiṃ, khalu tāya vanaṃ gatā”ti.

… Dantikā therī….