15. Cattālīsanipāto

1. Isidāsītherīgāthā

402. Nagaramhi kusumanāme, pāṭaliputtamhi pathaviyā maṇḍe;

sakyakulakulīnāyo, dve bhikkhuniyo hi guṇavatiyo.

403. Isidāsī tattha ekā, dutiyā bodhīti sīlasampannā ca;

jhānajjhāyanaratāyo, bahussutāyo dhutakilesāyo.

404. Tā piṇḍāya caritvā, bhattatthaṃ [bhattattaṃ (sī.)] kariya dhotapattāyo;

rahitamhi sukhanisinnā, imā girā abbhudīresuṃ.

405. “Pāsādikāsi ayye, isidāsi vayopi te aparihīno;

kiṃ disvāna byālikaṃ, athāsi nekkhammamanuyuttā”.

406. Evamanuyuñjiyamānā sā, rahite dhammadesanākusalā;

isidāsī vacanamabravi, “suṇa bodhi yathāmhi pabbajitā.

407. “Ujjeniyā puravare, mayhaṃ pitā sīlasaṃvuto seṭṭhi;

tassamhi ekadhītā, piyā manāpā ca dayitā ca.

408. “Atha me sāketato varakā, āgacchumuttamakulīnā;

seṭṭhī pahūtaratano, tassa mamaṃ suṇhamadāsi tāto.

409. “Sassuyā sassurassa ca, sāyaṃ pātaṃ paṇāmamupagamma;

sirasā karomi pāde, vandāmi yathāmhi anusiṭṭhā.

410. “Yā mayhaṃ sāmikassa, bhaginiyo bhātuno parijano vā;

tamekavarakampi disvā, ubbiggā āsanaṃ demi.

411. “Annena ca pānena ca, khajjena ca yañca tattha sannihitaṃ;

chādemi upanayāmi ca, demi ca yaṃ yassa patirūpaṃ.

412. “Kālena upaṭṭhahitvā [uṭṭhahitvā (syā. ka.), upaṭṭhahituṃ (?)], Gharaṃ samupagamāmi ummāre;

dhovantī hatthapāde, pañjalikā sāmikamupemi.

413. “Kocchaṃ pasādaṃ añjaniñca, ādāsakañca gaṇhitvā;

parikammakārikā viya, sayameva patiṃ vibhūsemi.

414. “Sayameva odanaṃ sādhayāmi, sayameva bhājanaṃ dhovantī;

mātāva ekaputtakaṃ, tathā [tadā (sī.)] bhattāraṃ paricarāmi.

415. “Evaṃ maṃ bhattikataṃ, anurattaṃ kārikaṃ nihatamānaṃ;

uṭṭhāyikaṃ [uṭṭhāhikaṃ (ka.)] analasaṃ, sīlavatiṃ dussate bhattā.

416. “So mātarañca pitarañca, bhaṇati ‘āpucchahaṃ gamissāmi;

isidāsiyā na saha vacchaṃ, ekāgārehaṃ [ekagharepa’haṃ (?)] Saha vatthuṃ’.

417. “‘Mā evaṃ putta avaca, isidāsī paṇḍitā paribyattā;

uṭṭhāyikā analasā, kiṃ tuyhaṃ na rocate putta’.

418. “‘Na ca me hiṃsati kiñci, na cahaṃ isidāsiyā saha vacchaṃ;

dessāva me alaṃ me, apucchāhaṃ [āpucchāhaṃ (syā.), āpucchahaṃ-nāpucchahaṃ (?)] Gamissāmi’.

419. “Tassa vacanaṃ suṇitvā, sassu sasuro ca maṃ apucchiṃsu;

‘kissa [kiṃsa (?)] Tayā aparaddhaṃ, bhaṇa vissaṭṭhā yathābhūtaṃ’.

420. “‘Napihaṃ aparajjhaṃ kiñci, napi hiṃsemi na bhaṇāmi dubbacanaṃ;

kiṃ sakkā kātuyye, yaṃ maṃ viddessate bhattā’.

421. “Te maṃ pitugharaṃ paṭinayiṃsu, vimanā dukhena adhibhūtā;

‘puttamanurakkhamānā, jitāmhase rūpiniṃ lakkhiṃ’.

422. “Atha maṃ adāsi tāto, aḍḍhassa gharamhi dutiyakulikassa;

tato upaḍḍhasuṅkena, yena maṃ vindatha seṭṭhi.

423. “Tassapi gharamhi māsaṃ, avasiṃ atha sopi maṃ paṭiccharayi [paṭicchasi (sī. ka.), paṭicchati (syā.), paṭiccharati (ka.)];

dāsīva upaṭṭhahantiṃ, adūsikaṃ sīlasampannaṃ.

424. “Bhikkhāya ca vicarantaṃ, damakaṃ dantaṃ me pitā bhaṇati;

‘hohisi [sohisi (sabbattha)] me jāmātā, nikkhipa poṭṭhiñca [pontiṃ (sī. syā.)] ghaṭikañca’.

425. “Sopi vasitvā pakkhaṃ [pakkamatha (sī.)], atha tātaṃ bhaṇati ‘dehi me poṭṭhiṃ;

ghaṭikañca mallakañca, punapi bhikkhaṃ carissāmi’.

426. “Atha naṃ bhaṇatī tāto, ammā sabbo ca me ñātigaṇavaggo;

‘kiṃ te na kīrati idha, bhaṇa khippaṃ taṃ te karihi’ti.

427. “Evaṃ bhaṇito bhaṇati, ‘yadi me attā sakkoti alaṃ mayhaṃ;

isidāsiyā na saha vacchaṃ, ekagharehaṃ saha vatthuṃ’.

428. “Vissajjito gato so, ahampi ekākinī vicintemi;

‘āpucchitūna gacchaṃ, marituye [maritāye (sī.), marituṃ (syā.)] vā pabbajissaṃ vā’.

429. “Atha ayyā jinadattā, āgacchī gocarāya caramānā;

tātakulaṃ vinayadharī, bahussutā sīlasampannā.

430. “Taṃ disvāna amhākaṃ, uṭṭhāyāsanaṃ tassā paññāpayiṃ;

nisinnāya ca pāde, vanditvā bhojanamadāsiṃ.

431. “Annena ca pānena ca, khajjena ca yañca tattha sannihitaṃ;

santappayitvā avacaṃ, ‘ayye icchāmi pabbajituṃ’.

432. “Atha maṃ bhaṇatī tāto, ‘idheva puttaka [puttike (syā. ka.)] carāhi tvaṃ dhammaṃ;

annena ca pānena ca, tappaya samaṇe dvijātī ca’.

433. “Athahaṃ bhaṇāmi tātaṃ, rodantī añjaliṃ paṇāmetvā;

‘pāpañhi mayā pakataṃ, kammaṃ taṃ nijjaressāmi’.

434. “Atha maṃ bhaṇatī tāto, ‘pāpuṇa bodhiñca aggadhammañca;

nibbānañca labhassu, yaṃ sacchikarī dvipadaseṭṭho’.

435. “Mātāpitū abhivādayitvā, sabbañca ñātigaṇavaggaṃ;

sattāhaṃ pabbajitā, tisso vijjā aphassayiṃ.

436. “Jānāmi attano satta, jātiyo yassayaṃ phalavipāko;

taṃ tava ācikkhissaṃ, taṃ ekamanā nisāmehi.

437. “Nagaramhi erakacche [erakakacche (syā. ka.)], suvaṇṇakāro ahaṃ pahūtadhano;

yobbanamadena matto so, paradāraṃ asevihaṃ.

438. “Sohaṃ tato cavitvā, nirayamhi apaccisaṃ ciraṃ;

pakko tato ca uṭṭhahitvā, makkaṭiyā kucchimokkamiṃ.

439. “Sattāhajātakaṃ maṃ, mahākapi yūthapo nillacchesi;

tassetaṃ kammaphalaṃ, yathāpi gantvāna paradāraṃ.

440. “Sohaṃ tato cavitvā, kālaṃ karitvā sindhavāraññe;

kāṇāya ca khañjāya ca, eḷakiyā kucchimokkamiṃ.

441. “Dvādasa vassāni ahaṃ, nillacchito dārake parivahitvā;

kimināvaṭṭo akallo, yathāpi gantvāna paradāraṃ.

442. “Sohaṃ tato cavitvā, govāṇijakassa gāviyā jāto;

vaccho lākhātambo, nillacchito dvādase māse.

443. “Voḍhūna [te puna (syā. ka.), vodhuna (ka. aṭṭha.)] naṅgalamahaṃ, sakaṭañca dhārayāmi;

andhovaṭṭo akallo, yathāpi gantvāna paradāraṃ.

444. “Sohaṃ tato cavitvā, vīthiyā dāsiyā ghare jāto;

neva mahilā na puriso, yathāpi gantvāna paradāraṃ.

445. “Tiṃsativassamhi mato, sākaṭikakulamhi dārikā jātā;

kapaṇamhi appabhoge, dhanika [aṇika (aṭṭha.), taṃsaṃvaṇṇanāyampi atthayutti gavesitabbā] purisapātabahulamhi.

446. “Taṃ maṃ tato satthavāho, ussannāya vipulāya vaḍḍhiyā;

okaḍḍhati vilapantiṃ, acchinditvā kulagharasmā.

447. “Atha soḷasame vasse, disvā maṃ pattayobbanaṃ kaññaṃ;

orundhatassa putto, giridāso nāma nāmena.

448. “Tassapi aññā bhariyā, sīlavatī guṇavatī yasavatī ca;

anurattā [anuvattā (ka.)] bhattāraṃ, tassāhaṃ [tassa taṃ (?)] Viddesanamakāsiṃ.

449. “Tassetaṃ kammaphalaṃ, yaṃ maṃ apakīritūna gacchanti;

dāsīva upaṭṭhahantiṃ, tassapi anto kato mayā”ti.

… Isidāsī therī….

Cattālīsanipāto niṭṭhito.