10. Jātipūjakatthera-apadānaṃ

82. “Jāyantassa vipassissa, āloko vipulo ahu;

pathavī ca pakampittha, sasāgarā sapabbatā.

83. “Nemittā ca viyākaṃsu, buddho loke bhavissati;

aggo ca sabbasattānaṃ, janataṃ uddharissati.

84. “Nemittānaṃ suṇitvāna, jātipūjamakāsahaṃ;

edisā pūjanā natthi, yādisā jātipūjanā.

85. “Saṅkharitvāna [saṃharitvāna (sī. syā.), saṅkaritvāna (ka.)]

kusalaṃ, sakaṃ cittaṃ pasādayiṃ;

jātipūjaṃ karitvāna, tattha kālaṅkato ahaṃ.

86. “Yaṃ yaṃ yonupapajjāmi, devattaṃ atha mānusaṃ;

sabbe satte abhibhomi, jātipūjāyidaṃ phalaṃ.

87. “Dhātiyo maṃ upaṭṭhanti, mama cittavasānugā;

na tā sakkonti kopetuṃ, jātipūjāyidaṃ phalaṃ.

88. “Ekanavutito kappe, yaṃ pūjamakariṃ tadā;

duggatiṃ nābhijānāmi, jātipūjāyidaṃ phalaṃ.

89. “Supāricariyā nāma, catuttiṃsa janādhipā;

ito tatiyakappamhi, cakkavattī mahabbalā.

90. “Paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā jātipūjako thero imā gāthāyo abhāsitthāti;

jātipūjakattherassāpadānaṃ dasamaṃ;

mahāparivāravaggo dvādasamo;

tassuddānaṃ–

parivārasumaṅgalā, saraṇāsanapupphiyā;
citapūjī buddhasaññī, maggupaṭṭhānajātinā;
gāthāyo navuti vuttā, gaṇitāyo vibhāvihi.