39. Avaṭaphalavaggo

1. Avaṭaphaladāyakatthera-apadānaṃ

1. “Sataraṃsi nāma bhagavā, sayambhū aparājito;

vivekakāmo sambuddho, gocarāyābhinikkhami.

2. “Phalahattho ahaṃ disvā, upagacchiṃ narāsabhaṃ;

pasannacitto sumano, avaṭaṃ [avaṇṭaṃ (sī.), ambaṭaṃ (syā.)] adadiṃ phalaṃ.

3. “Catunnavutito kappe, yaṃ phalamadadiṃ ahaṃ;

duggatiṃ nābhijānāmi, phaladānassidaṃ phalaṃ.

4. “Kilesā jhāpitā mayhaṃ, bhavā sabbe samūhatā;

nāgova bandhanaṃ chetvā, viharāmi anāsavo.

5. “Svāgataṃ vata me āsi, mama buddhassa santike;

tisso vijjā anuppattā, kataṃ buddhassa sāsanaṃ.

6. “Paṭisambhidā catasso, vimokkhāpi ca aṭṭhime;

chaḷabhiññā sacchikatā, kataṃ buddhassa sāsanaṃ”.

Itthaṃ sudaṃ āyasmā avaṭaphaladāyako thero imā gāthāyo abhāsitthāti.

Avaṭaphaladāyakattherassāpadānaṃ paṭhamaṃ.