Sahāyakaṃ gavesanto, assamaṃ agamāsahaṃ.

292. “Dūratova mamaṃ disvā, sahāyo me susikkhito;

iriyāpathasampanno [iriyāpathaṃ mamaṃ disvā (ka.)], idaṃ vacanamabravi.

293. “‘Pasannamukhanettosi, munibhāvova dissati;

amatādhigato kacci, nibbānamaccutaṃ padaṃ.

294. “‘Subhānurūpo āyāsi, āneñjakārito viya;

dantova dantadamatho [dantovuttamadamatho (sī.) dantova danta damathe (syā.)], upasantosi brāhmaṇa.

295. “‘Amataṃ mayādhigataṃ, sokasallāpanūdanaṃ;

tvampi taṃ adhigacchesi [adhigacchāhi (sī.), adhigacchehi (syā.), adhigatosi (?)], Gacchāma buddhasantikaṃ’.

296. “Sādhūti so paṭissutvā, sahāyo me susikkhito;

hatthena hatthaṃ gaṇhitvā, upagamma [upāgami (sī.), upāgamma (syā.)] tavantikaṃ.

297. “Ubhopi pabbajissāma, sakyaputta tavantike;

tava sāsanamāgamma, viharāma anāsavā.

298. “Kolito iddhiyā seṭṭho, ahaṃ paññāya pārago;

ubhova ekato hutvā, sāsanaṃ sobhayāmase.

299. “Apariyositasaṅkappo kutitthe sañcariṃ ahaṃ;

tava dassanamāgamma, saṅkappo pūrito mama.

300. “Pathaviyaṃ patiṭṭhāya, pupphanti samaye dumā;

dibbagandhā sampavanti, tosenti sabbapāṇinaṃ.

301. “Tathevāhaṃ mahāvīra, sakyaputta mahāyasa;

sāsane te patiṭṭhāya, samayesāmi pupphituṃ.

302. “Vimuttipupphaṃ esanto, bhavasaṃsāramocanaṃ;

vimuttipupphalābhena, tosemi sabbapāṇinaṃ.

303. “Yāvatā buddhakhettamhi, ṭhapetvāna mahāmuniṃ;

paññāya sadiso natthi, tava puttassa cakkhuma.

304. “Suvinītā ca te sissā, parisā ca susikkhitā;

uttame damathe dantā, parivārenti taṃ sadā.

305. “Jhāyī jhānaratā dhīrā, santacittā samāhitā;

munī moneyyasampannā, parivārenti taṃ sadā.

306. “Appicchā nipakā dhīrā, appāhārā alolupā;

lābhālābhena santuṭṭhā, parivārenti taṃ sadā.

307. “Āraññikā dhutaratā, jhāyino lūkhacīvarā;

vivekābhiratā dhīrā, parivārenti taṃ sadā.

308. “Paṭipannā phalaṭṭhā ca, sekhā phalasamaṅgino;

āsīsakā [āsiṃsakā (sī. syā.)] uttamatthaṃ, parivārenti taṃ sadā.

309. “Sotāpannā ca vimalā, sakadāgāmino ca ye;

anāgāmī ca arahā, parivārenti taṃ sadā.

310. “Satipaṭṭhānakusalā, bojjhaṅgabhāvanāratā;

sāvakā te bahū sabbe, parivārenti taṃ sadā.

311. “Iddhipādesu kusalā, samādhibhāvanāratā;

sammappadhānānuyuttā, parivārenti taṃ sadā.

312. “Tevijjā chaḷabhiññā ca, iddhiyā pāramiṃ gatā;

paññāya pāramiṃ pattā, parivārenti taṃ sadā.

313. “Edisā te mahāvīra, tava sissā susikkhitā;

durāsadā uggatejā, parivārenti taṃ sadā.

314. “Tehi sissehi parivuto, saññatehi tapassibhi;

migarājāvasambhīto, uḷurājāva sobhasi.

315. “Pathaviyaṃ patiṭṭhāya, ruhanti dharaṇīruhā;

vepullataṃ pāpuṇanti, phalañca dassayanti te.

316. “Pathavīsadiso tvaṃsi, sakyaputta mahāyasa;

sāsane te patiṭṭhāya, labhanti amataṃ phalaṃ.

317. “Sindhu sarassatī ceva, nadiyo candabhāgikā;

gaṅgā ca yamunā ceva, sarabhū ca atho mahī.

318. “Etāsaṃ sandamānānaṃ, sāgaro sampaṭicchati;

jahanti purimaṃ nāmaṃ, sāgaroteva ñāyati.

319. “Tathevime catubbaṇṇā, pabbajitvā tavantike;

jahanti purimaṃ nāmaṃ, buddhaputtāti ñāyare.

320. “Yathāpi cando vimalo, gacchaṃ ākāsadhātuyā;

sabbe tāragaṇe loke, ābhāya atirocati.

321. “Tatheva tvaṃ mahāvīra, parivuto devamānuse;

ete sabbe atikkamma, jalasi sabbadā tuvaṃ.

322. “Gambhīre uṭṭhitā ūmī, na velamativattare;

sabbā velaṃva phusanti [sabbāva velaṃ phusanti (sī.), sabbā velaṃ paphussanti (syā.)], sañcuṇṇā vikiranti tā.

323. “Tatheva titthiyā loke, nānādiṭṭhī bahujjanā;

dhammaṃ vāditukāmā te, nātivattanti taṃ muniṃ.

324. “Sace ca taṃ pāpuṇanti, paṭivādehi cakkhuma;

tavantikaṃ upāgantvā, sañcuṇṇāva bhavanti te.

325. “Yathāpi udake jātā, kumudā mandālakā bahū;

upalimpanti [upalippanti (?)] Toyena, kaddamakalalena ca.

326. “Tatheva bahukā sattā, loke jātā virūhare;

aṭṭitā rāgadosena, kaddame kumudaṃ yathā.

327. “Yathāpi padumaṃ jalajaṃ, jalamajjhe virūhati;

na so limpati toyena, parisuddho hi kesarī.

328. “Tatheva tvaṃ mahāvīra, loke jāto mahāmuni;

nopalimpasi lokena, toyena padumaṃ yathā.

329. “Yathāpi rammake māse, bahū pupphanti vārijā;

nātikkamanti taṃ māsaṃ, samayo pupphanāya so.

330. “Tatheva tvaṃ mahāvīra, pupphito te vimuttiyā;

sāsanaṃ nātivattanti, padumaṃ vārijaṃ yathā.

331. “Supupphito sālarājā, dibbagandhaṃ pavāyati;

aññasālehi parivuto, sālarājāva sobhati.

332. “Tatheva tvaṃ mahāvīra, buddhañāṇena pupphito;

bhikkhusaṅghaparivuto, sālarājāva sobhasi.

333. “Yathāpi selo himavā, osadho sabbapāṇinaṃ;

nāgānaṃ asurānañca, devatānañca ālayo.

334. “Tatheva tvaṃ mahāvīra, osadho viya pāṇinaṃ;

tevijjā chaḷabhiññā ca, iddhiyā pāramiṃ gatā.

335. “Anusiṭṭhā mahāvīra, tayā kāruṇikena te;

ramanti dhammaratiyā, vasanti tava sāsane.

336. “Migarājā yathā sīho, abhinikkhamma āsayā;

catuddisānuviloketvā [viloketvā (sī. syā.), nuloketvā (ka.)],

Tikkhattuṃ abhinādati.

337. “Sabbe migā uttasanti, migarājassa gajjato;

tathā hi jātimā eso, pasū tāseti sabbadā.

338. “Gajjato te mahāvīra, vasudhā sampakampati;

bodhaneyyāvabujjhanti, tasanti mārakāyikā.

339. “Tasanti titthiyā sabbe, nadato te mahāmuni;

kākā senāva vibbhantā, migaraññā yathā migā.

340. “Ye keci gaṇino loke, satthāroti pavuccare;

paramparāgataṃ dhammaṃ, desenti parisāya te.

341. “Na hevaṃ tvaṃ mahāvīra, dhammaṃ desesi pāṇinaṃ;

sāmaṃ saccāni bujjhitvā, kevalaṃ bodhipakkhiyaṃ.

342. “Āsayānusayaṃ ñatvā, indriyānaṃ balābalaṃ;

bhabbābhabbe viditvāna, mahāmeghova gajjasi.

343. “Cakkavāḷapariyantā nisinnā parisā bhave;

nānādiṭṭhī vicinantā [vicintenti (syā.), vicinantaṃ (ka.)], vimaticchedanāya taṃ.

344. “Sabbesaṃ cittamaññāya, opammakusalo muni;

ekaṃ pañhaṃ kathentova, vimatiṃ chindasi [chindi (syā. ka.)] pāṇinaṃ.

345. “Upatissasadiseheva, vasudhā pūritā bhave;

sabbeva te pañjalikā, kittayuṃ lokanāyakaṃ.

346. “Kappaṃ vā te kittayantā, nānāvaṇṇehi kittayuṃ;

parimetuṃ na sakkeyyuṃ [na kappeyyuṃ (syā.), na pappeyyuṃ (ka.)], appameyyo tathāgato.

347. “Yathāsakena thāmena, kittito hi mayā jino;

kappakoṭīpi kittentā, evameva pakittayuṃ.

348. “Sace hi koci devo vā, manusso vā susikkhito;

pametuṃ parikappeyya, vighātaṃva labheyya so.

349. “Sāsane te patiṭṭhāya, sakyaputta mahāyasa;

paññāya pāramiṃ gantvā, viharāmi anāsavo.

350. “Titthiye sampamaddāmi, vattemi jinasāsanaṃ;

dhammasenāpati ajja, sakyaputtassa sāsane.

351. “Aparimeyye kataṃ kammaṃ, phalaṃ dassesi me idha;

sukhitto saravegova, kilese jhāpayī mama [jhāpayiṃ mama (syā.), jhāpayiṃ ahaṃ (ka.)].

352. “Yo koci manujo bhāraṃ, dhāreyya matthake sadā;

bhārena dukkhito assa, bhārehi bharito tathā.

353. “Ḍayhamāno tīhaggīhi, bhavesu saṃsariṃ ahaṃ;

bharito bhavabhārena, giriṃ uccārito yathā.

354. “Oropito ca me bhāro, bhavā ugghāṭitā mayā;

karaṇīyaṃ kataṃ sabbaṃ, sakyaputtassa sāsane.

355. “Yāvatā buddhakhettamhi, ṭhapetvā sakyapuṅgavaṃ;

ahaṃ aggomhi paññāya, sadiso me na vijjati.

356. “Samādhimhi sukusalo, iddhiyā pāramiṃ gato;

icchamāno cahaṃ ajja, sahassaṃ abhinimmine.

357. “Anupubbavihārassa vasībhūto mahāmuni;

kathesi sāsanaṃ mayhaṃ, nirodho sayanaṃ mama.

358. “Dibbacakkhu visuddhaṃ me, samādhikusalo ahaṃ;

sammappadhānānuyutto, bojjhaṅgabhāvanārato.

359. “Sāvakena hi pattabbaṃ, sabbameva kataṃ mayā;

lokanāthaṃ ṭhapetvāna, sadiso me na vijjati.

360. “Samāpattīnaṃ kusalo [samāpattinayakusalo (sī.)], jhānavimokkhāna khippapaṭilābhī;

bojjhaṅgabhāvanārato, sāvakaguṇapāramigatosmi.

361. “Sāvakaguṇenapi phussena [sāvakaguṇaphussena (syā.)], buddhiyā parisuttamabhāravā [purisuttamagāravā (syā.), purisuttamabhāravā (ka.)];

yaṃ saddhāsaṅgahitaṃ [saddhāya saṅgahitaṃ (sī.), saddāsaṅgahitaṃ (syā.)] cittaṃ, sadā sabrahmacārīsu.

362. “Uddhatavisova sappo, chinnavisāṇova usabho;

nikkhittamānadappova [dabbova (ka.)], upemi garugāravena gaṇaṃ.

363. “Yadi rūpinī bhaveyya, paññā me vasumatīpi [vasumatī (sī. ka.) vasupatīnaṃ (syā.)] na sameyya;

anomadassissa [anomadassi (?)] Bhagavato, phalametaṃ ñāṇathavanāya.

364. “Pavattitaṃ dhammacakkaṃ, sakyaputtena tādinā;

anuvattemahaṃ sammā, ñāṇathavanāyidaṃ phalaṃ.

365. “Mā me kadāci pāpiccho, kusīto hīnavīriyo;

appassuto anādaro [anācāro (sabbattha) theragā. 987 passitabbā], sameto ahu katthaci.

366. “Bahussuto ca medhāvī, sīlesu susamāhito;

cetosamathānuyutto, api muddhani tiṭṭhatu.

367. “Taṃ vo vadāmi bhaddante, yāvantettha samāgatā;

appicchā hotha santuṭṭhā, jhāyī jhānaratā sadā.

368. “Yamahaṃ paṭhamaṃ disvā, virajo vimalo ahuṃ;

so me ācariyo dhīro, assaji nāma sāvako.

369. “Tassāhaṃ vāhasā ajja, dhammasenāpatī ahuṃ;

sabbattha pāramiṃ patvā, viharāmi anāsavo.

370. “Yo me ācariyo āsi, assaji nāma sāvako;

yassaṃ disāyaṃ vasati, ussīsamhi karomahaṃ.

371. “Mama kammaṃ saritvāna, gotamo sakyapuṅgavo;

bhikkhusaṅghe nisīditvā, aggaṭṭhāne ṭhapesi maṃ.

372. [Imā dve gāthāyo syāmapotthake na santi]

kilesā jhāpitā mayhaṃ, bhavā sabbe samūhatā;

nāgova bandhanaṃ chetvā, viharāmi anāsavo.

373. “Svāgataṃ vata me āsi, buddhaseṭṭhassa santike;

tisso vijjā anuppattā, kataṃ buddhassa sāsanaṃ [imā dve gāthāro syāmapotthake na santi].

374. “Paṭisambhidā catasso [catasso ca (sī.)], vimokkhāpi ca aṭṭhime;

chaḷabhiññā sacchikatā, kataṃ buddhassa sāsanaṃ”.

Itthaṃ sudaṃ āyasmā sāriputto thero imā gāthāyo

Abhāsitthāti.

Sāriputtattherassāpadānaṃ paṭhamaṃ.