4. Dhotakatthera-apadānaṃ

72. “Gaṅgā bhāgīrathī nāma, himavantā pabhāvitā [himavantappabhāvitā (sī.)];

haṃsavatiyā dvārena, anusandati tāvade.

73. “Sobhito nāma ārāmo, gaṅgākūle sumāpito;

tattha padumuttaro buddho, vasate lokanāyako.

74. “Tidasehi yathā indo, manujehi purakkhato;

nisīdi tattha bhagavā, asambhītova kesarī.

75. “Nagare haṃsavatiyā, vasāmi [ahosiṃ (syā.)] brāhmaṇo ahaṃ;

chaḷaṅgo nāma nāmena, evaṃnāmo mahāmuni.

76. “Aṭṭhārasa sissasatā, parivārenti maṃ tadā;

tehi sissehi samito, gaṅgātīraṃ upāgamiṃ.

77. “Tatthaddasāsiṃ samaṇe, nikkuhe dhotapāpake;

bhāgīrathiṃ tarantehaṃ [tarantohaṃ (syā. pī.)], evaṃ cintesi tāvade.

78. “Sāyaṃ pātaṃ [sāyapātaṃ (pī.)] tarantāme, buddhaputtā mahāyasā;

vihesayanti attānaṃ, tesaṃ attā vihaññati.

79. “Sadevakassa lokassa, buddho aggo pavuccati;

natthi me dakkhiṇe kāraṃ, gatimaggavisodhanaṃ.

80. “Yaṃnūna buddhaseṭṭhassa, setuṃ gaṅgāya kāraye;

kārāpetvā imaṃ kammaṃ [setuṃ (syā.)], santarāmi imaṃ bhavaṃ.

81. “Satasahassaṃ datvāna, setuṃ kārāpayiṃ ahaṃ;

saddahanto kataṃ kāraṃ, vipulaṃ me bhavissati.

82. “Kārāpetvāna taṃ setuṃ, upesiṃ lokanāyakaṃ;

sirasi añjaliṃ katvā, imaṃ vacanamabraviṃ.

83. “‘Satasahassassa vayaṃ [vayaṃ satasahassaṃva (ka.)], datvā [katvā (sī. pī.)] kārāpito mayā;

tavatthāya mahāsetu, paṭiggaṇha mahāmune.

84. “‘Padumuttaro lokavidū, āhutīnaṃ paṭiggaho;

bhikkhusaṅghe nisīditvā, imā gāthā abhāsatha.

85. “‘Yo me setuṃ akāresi, pasanno sehi pāṇibhi;

tamahaṃ kittayissāmi, suṇātha mama bhāsato.

(Setudāna-ānisaṃso)

86. “‘Darito pabbatato vā, rukkhato patitopiyaṃ;

cutopi lacchatī ṭhānaṃ, setudānassidaṃ phalaṃ.

87. “‘Virūḷhamūlasantānaṃ, nigrodhamiva māluto;

amittā nappasahanti, setudānassidaṃ phalaṃ.

88. “‘Nāssa corā pasahanti, nātimaññanti khattiyā;

sabbe tarissatāmitte, setudānassidaṃ phalaṃ.

89. “‘Abbhokāsagataṃ santaṃ, kaṭhinātapatāpitaṃ;

puññakammena saṃyuttaṃ, na bhavissati vedanā [tāvade (ka.)].

90. “‘Devaloke manusse vā, hatthiyānaṃ sunimmitaṃ;

tassa saṅkappamaññāya, nibbattissati tāvade.

91. “‘Sahassassā vātajavā, sindhavā sīghavāhanā;

sāyaṃ pātaṃ upessanti, setudānassidaṃ phalaṃ.

92. “‘Āgantvāna manussattaṃ, sukhitoyaṃ bhavissati;

vehāsaṃ [ihāpi (sī. syā. pī.)] manujasseva, hatthiyānaṃ bhavissati.

93. “‘Kappasatasahassamhi, okkākakulasambhavo;

gotamo nāma gottena, satthā loke bhavissati.

94. “‘Tassa dhammesu dāyādo, oraso dhammanimmito;

sabbāsave pariññāya, nibbāyissatināsavo’.

95. “Aho me sukataṃ kammaṃ, jalajuttamanāmake;

tattha kāraṃ karitvāna, pattohaṃ āsavakkhayaṃ.

96. “Padhānaṃ pahitattomhi, upasanto nirūpadhi;

nāgova bandhanaṃ chetvā, viharāmi anāsavo.

97. “Kilesā jhāpitā mayhaṃ…pe… viharāmi anāsavo;

98. “svāgataṃ vata me āsi…pe… kataṃ buddhassa sāsanaṃ;

99. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā dhotako thero imā gāthāyo abhāsitthāti;

dhotakattherassāpadānaṃ catutthaṃ;