6. Nandakatthera-apadānaṃ

161. “Migaluddo pure āsiṃ, araññe kānane ahaṃ;

pasadaṃ migamesanto, sayambhuṃ addasaṃ ahaṃ [jinaṃ (sī.)].

162. “Anuruddho nāma sambuddho, sayambhū aparājito;

vivekakāmo so dhīro, vanamajjhogahī tadā.

163. “Catudaṇḍe gahetvāna, catuṭṭhāne ṭhapesahaṃ;

maṇḍapaṃ sukataṃ katvā, padmapupphehi chādayiṃ.

164. “Maṇḍapaṃ chādayitvāna, sayambhuṃ abhivādayiṃ;

dhanuṃ tattheva nikkhippa, pabbajiṃ anagāriyaṃ.

165. “Naciraṃ pabbajitassa [pabbajitassa aciraṃ (sī.)], byādhi me udapajjatha;

pubbakammaṃ saritvāna, tattha kālaṅkato ahaṃ.

166. “Pubbakammena saṃyutto, tusitaṃ agamāsahaṃ;

tattha soṇṇamayaṃ byamhaṃ, nibbattati yadicchakaṃ.

167. “Sahassayuttaṃ hayavāhiṃ, dibbayānamadhiṭṭhito;

āruhitvāna taṃ yānaṃ, gacchāmahaṃ yadicchakaṃ.

168. “Tato me niyyamānassa, devabhūtassa me sato;

samantā yojanasataṃ, maṇḍapo me dharīyati.

169. “Sayanehaṃ tuvaṭṭāmi, acchanne [accantaṃ (sī.), accanta (pī.)] pupphasanthate;

antalikkhā ca padumā, vassante niccakālikaṃ.

170. “Marīcike phandamāne, tappamāne ca ātape;

na maṃ tāpeti ātāpo, maṇḍapassa idaṃ phalaṃ.

171. “Duggatiṃ samatikkanto, apāyā pihitā mama;

maṇḍape rukkhamūle vā, santāpo me na vijjati.

172. “Mahīsaññaṃ adhiṭṭhāya, loṇatoyaṃ tarāmahaṃ;

tassa me sukataṃ kammaṃ, buddhapūjāyidaṃ phalaṃ.

173. “Apathampi [abbhamhi (syā. ka.)] pathaṃ katvā, gacchāmi anilañjase;

aho me sukataṃ kammaṃ, buddhapūjāyidaṃ phalaṃ.

174. “Pubbenivāsaṃ jānāmi, dibbacakkhu visodhitaṃ;

āsavā me parikkhīṇā, buddhapūjāyidaṃ phalaṃ.

175. “Jahitā purimā jāti, buddhassa oraso ahaṃ;

dāyādomhi ca saddhamme, buddhapūjāyidaṃ phalaṃ.

176. “Ārādhitomhi sugataṃ, gotamaṃ sakyapuṅgavaṃ;

dhammadhajo dhammadāyādo [dhammādāso (ka.)], buddhapūjāyidaṃ phalaṃ.

177. “Upaṭṭhitvāna sambuddhaṃ, gotamaṃ sakyapuṅgavaṃ;

pāraṅgamaniyaṃ maggaṃ, apucchiṃ lokanāyakaṃ.

178. “Ajjhiṭṭho kathayī buddho, gambhīraṃ nipuṇaṃ padaṃ;

tassāhaṃ dhammaṃ sutvāna, pattomhi āsavakkhayaṃ.

179. “Aho me sukataṃ kammaṃ, parimuttomhi jātiyā;

sabbāsavaparikkhīṇo, natthi dāni punabbhavo.

180. “Kilesā jhāpitā mayhaṃ…pe… viharāmi anāsavo;

181. “svāgataṃ vata me āsi…pe… kataṃ buddhassa sāsanaṃ;

182. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā nandako thero imā gāthāyo abhāsitthāti;

nandakattherassāpadānaṃ chaṭṭhaṃ;