7. Hemakatthera-apadānaṃ

183. “Pabbhārakūṭaṃ nissāya, anomo nāma tāpaso;

assamaṃ sukataṃ katvā, paṇṇasāle vasī tadā.

184. “Siddhaṃ tassa tapo kammaṃ, siddhipatto sake bale;

sakasāmaññavikkanto, ātāpī nipako muni.

185. “Visārado sasamaye, paravāde ca kovido;

paṭṭho bhūmantalikkhamhi, uppātamhi ca kovido.

186. “Vītasoko nirārambho, appāhāro alolupo;

lābhālābhena santuṭṭho, jhāyī jhānarato muni.

187. “Piyadassī nāma sambuddho, aggo kāruṇiko muni;

satte tāretukāmo so, karuṇāya pharī tadā.

188. “Bodhaneyyaṃ janaṃ disvā, piyadassī mahāmuni;

cakkavāḷasahassampi, gantvā ovadate muni.

189. “Mamuddharitukāmo so, mamassamamupāgami;

na diṭṭho me jino pubbe, na sutopi ca kassaci.

190. “Uppātā supinā mayhaṃ, lakkhaṇā suppakāsitā;

paṭṭho bhūmantalikkhamhi, nakkhattapadakovido.

191. “Sohaṃ buddhassa sutvāna, tattha cittaṃ pasādayiṃ;

tiṭṭhanto [bhuñjanto (sī. pī. ka.)] vā nisinno vā, sarāmi niccakālikaṃ.

192. “Mayi evaṃ sarantamhi, bhagavāpi anussari;

buddhaṃ anussarantassa, pīti me hoti tāvade.

193. “Kālañca punarāgamma, upesi maṃ mahāmuni;

sampattepi na jānāmi, ayaṃ buddho mahāmuni.

194. “Anukampako kāruṇiko, piyadassī mahāmuni;

sañjānāpesi attānaṃ, ‘ahaṃ buddho sadevake’.

195. “Sañjānitvāna sambuddhaṃ, piyadassiṃ mahāmuniṃ;

sakaṃ cittaṃ pasādetvā, idaṃ vacanamabraviṃ.

196. “‘Aññe [sabbe (syā.)] pīṭhe ca pallaṅke, āsandīsu nisīdare;

tuvampi sabbadassāvī, nisīda ratanāsane’.

197. “Sabbaratanamayaṃ pīṭhaṃ, nimminitvāna tāvade;

piyadassissa munino, adāsiṃ iddhinimmitaṃ.

198. “Ratane ca nisinnassa, pīṭhake iddhinimmite;

kumbhamattaṃ jambuphalaṃ, adāsiṃ tāvade ahaṃ.

199. “Mama hāsaṃ janetvāna, paribhuñji mahāmuni;

tadā cittaṃ pasādetvā, satthāraṃ abhivādayiṃ.

200. “Piyadassī tu bhagavā, lokajeṭṭho narāsabho;

ratanāsanamāsīno, imā gāthā abhāsatha.

201. “‘Yo me ratanamayaṃ pīṭhaṃ, amatañca phalaṃ adā;

tamahaṃ kittayissāmi, suṇātha mama bhāsato.

202. “‘Sattasattati kappāni, devaloke ramissati;

pañcasattatikkhattuñca, cakkavattī bhavissati.

203. “‘Dvattiṃsakkhattuṃ devindo, devarajjaṃ karissati;

padesarajjaṃ vipulaṃ, gaṇanāto asaṅkhiyaṃ.

204. “‘Soṇṇamayaṃ rūpimayaṃ, pallaṅkaṃ sukataṃ bahuṃ;

lohitaṅgamayañceva, lacchati ratanāmayaṃ.

205. “‘Caṅkamantampi manujaṃ, puññakammasamaṅginaṃ;

pallaṅkāni anekāni, parivāressare tadā.

206. “‘Kūṭāgārā ca pāsādā, sayanañca mahārahaṃ;

imassa cittamaññāya, nibbattissanti tāvade.

207. “‘Saṭṭhi nāgasahassāni, sabbālaṅkārabhūsitā;

suvaṇṇakacchā mātaṅgā, hemakappanavāsasā [hemakappanivāsanā (sī. syā.), hemakappanivāsasā (ka.)].

208. “‘Ārūḷhā gāmaṇīyehi, tomaraṅkusapāṇibhi;

imaṃ paricarissanti, ratnapīṭhassidaṃ phalaṃ.

209. “‘Saṭṭhi assasahassāni, sabbālaṅkārabhūsitā;

ājānīyāva jātiyā, sindhavā sīghavāhino.

210. “‘Ārūḷhā gāmaṇīyehi, illiyācāpadhāribhi;

tepimaṃ paricarissanti, ratnapīṭhassidaṃ phalaṃ.

211. “‘Saṭṭhi rathasahassāni, sabbālaṅkārabhūsitā;

dīpā athopi veyagghā, sannaddhā ussitaddhajā.

212. “‘Ārūḷhā gāmaṇīyehi, cāpahatthehi vammibhi;

parivāressantimaṃ niccaṃ, ratnapīṭhassidaṃ phalaṃ.

213. “‘Saṭṭhi dhenusahassāni, dohaññā puṅgavūsabhe;

vacchake janayissanti, ratnapīṭhassidaṃ phalaṃ.

214. “‘Soḷasitthisahassāni, sabbālaṅkārabhūsitā;

vicittavatthābharaṇā, āmukkamaṇikuṇḍalā.

215. “‘Aḷārapamhā hasulā, susaññā tanumajjhimā;

parivāressantimaṃ niccaṃ, ratnapīṭhassidaṃ phalaṃ.

216. “‘Aṭṭhārase kappasate, gotamo nāma cakkhumā;

tamandhakāraṃ vidhamitvā, buddho loke bhavissati.

217. “‘Tassa dassanamāgamma, pabbajissatikiñcano;

tosayitvāna satthāraṃ, sāsanebhiramissati.

218. “‘Tassa dhammaṃ suṇitvāna, kilese ghātayissati;

sabbāsave pariññāya, nibbāyissatināsavo’.

219. “Vīriyaṃ me dhuradhorayhaṃ, yogakkhemādhivāhanaṃ;

uttamatthaṃ patthayanto, sāsane viharāmahaṃ.

220. “Idaṃ pacchimakaṃ mayhaṃ, carimo vattate bhavo;

sabbāsavā parikkhīṇā, natthi dāni punabbhavo.

221. “Kilesā jhāpitā mayhaṃ…pe… viharāmi anāsavo;

222. “svāgataṃ vata me āsi…pe… kataṃ buddhassa sāsanaṃ;

223. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā hemako thero imā gāthāyo abhāsitthāti.

Hemakattherassāpadānaṃ sattamaṃ.

Sattarasamaṃ bhāṇavāraṃ.