8. Todeyyatthera-apadānaṃ

224. “Rājā ajitañjayo [rājāsi vijayo (sī. aṭṭha.), rājā vijitajayo (syā.)] nāma, ketumatīpuruttame;

sūro vikkamasampanno, puramajjhāvasī tadā.

225. “Tassa rañño pamattassa, aṭaviyo samuṭṭhahuṃ;

otārā [uttarā (syā.), ocarā (pī.)] tuṇḍikā ceva, raṭṭhaṃ viddhaṃsayuṃ tadā.

226. “Paccante kupite khippaṃ, sannipātesirindamo;

bhaṭe ceva balatthe ca, ariṃ niggāhayi tadā.

227. “Hatthārohā anīkaṭṭhā, sūrā ca cammayodhino;

dhanuggahā ca uggā ca, sabbe sannipatuṃ tadā.

228. “Āḷārikā ca kappakā, nhāpakā mālakārakā;

sūrā vijitasaṅgāmā, sabbe sannipatuṃ tadā.

229. “Khaggahatthā ca purisā, cāpahatthā ca vammino;

luddā vijitasaṅgāmā, sabbe sannipatuṃ tadā.

230. “Tidhāpabhinnā mātaṅgā, kuñjarā saṭṭhihāyanā;

suvaṇṇakacchālaṅkārā, sabbe sannipatuṃ tadā.

231. “Khamā sītassa uṇhassa, ukkāruharaṇassa ca;

yodhājīvā katakammā, sabbe sannipatuṃ tadā.

232. “Saṅkhasaddaṃ bherisaddaṃ, atho utuja [uddhava (sī.), uddaṭa (syā.)] saddakaṃ;

etehi te hāsayantā, sabbe sannipatuṃ tadā.

233. “Tisūlakontimantehi [tisūlakontamantehi (sī.), kavacehi tomarehi (sī.), dhanūhi tomarehi (syā.)] ca;

koṭṭentānaṃ nipātentā [koṭṭayantā nivattentā (syā.)], sabbe sannipatuṃ tadā.

234. “Kimevātinisāmetvā [kavacānivāsetvā (syā.)], sarājā ajitañjayo [ajinaṃ jino (sī.), ajitañjino (syā.)];

saṭṭhi pāṇasahassāni, sūle uttāsayiṃ tadā.

235. “Saddaṃ mānusakākaṃsu, aho rājā adhammiko;

niraye paccamānassa, kadā anto bhavissati.

236. “Sayanehaṃ tuvaṭṭento, passāmi niraye tadā;

na supāmi divārattiṃ, sūlena tajjayanti maṃ.

237. “Kiṃ pamādena rajjena, vāhanena balena ca;

na te pahonti dhāretuṃ, tāpayanti [tāsayanti (sī. syā.)] mamaṃ sadā.

238. “Kiṃ me puttehi dārehi, rajjena sakalena ca;

yaṃnūna pabbajeyyāhaṃ, gatimaggaṃ visodhaye.

239. “Saṭṭhi nāgasahassāni, sabbālaṅkārabhūsite;

suvaṇṇakacche mātaṅge, hemakappanavāsase.

240. “Ārūḷhe gāmaṇīyehi, tomaraṅkusapāṇibhi;

saṅgāmāvacare ṭhāne, anapekkho vihāyahaṃ;
sakakammena santatto, nikkhamiṃ anagāriyaṃ.

241. “Saṭṭhi assasahassāni, sabbālaṅkārabhūsite;

ājānīyeva jātiyā, sindhave sīghavāhane.

242. “Ārūḷhe gāmaṇīyehi, cāpahatthehi vammibhi;

pahāretvāna [pahāyitvāna (sī. pī.), chaḍḍayitvāna (syā.)] te sabbe, nikkhamiṃ anagāriyaṃ.

243. “Saṭṭhi rathasahassāni, sabbālaṅkārabhūsite;

dīpe athopi veyagghe, sannaddhe ussitaddhaje;
te sabbe parihāretvā [parivajjetvā (syā.), parihāyitvā (pī.)], pabbajiṃ anagāriyaṃ.

244. “Saṭṭhi dhenusahassāni, sabbā kaṃsūpadhāraṇā;

tāyopi [gāviyo (syā.), dhenuyo (ka.)] chaḍḍayitvāna, pabbajiṃ anagāriyaṃ.

245. “Saṭṭhi itthisahassāni, sabbālaṅkārabhūsitā;

vicittavatthābharaṇā, āmukkamaṇikuṇḍalā.

246. “Aḷārapamhā hasulā, susaññā tanumajjhimā;

tā hitvā kandamānāyo, pabbajiṃ anagāriyaṃ.

247. “Saṭṭhi gāmasahassāni, paripuṇṇāni sabbaso;

chaḍḍayitvāna taṃ rajjaṃ, pabbajiṃ anagāriyaṃ.

248. “Nagarā nikkhamitvāna, himavantamupāgamiṃ;

bhāgīrathīnadītīre, assamaṃ māpayiṃ ahaṃ.

249. “Paṇṇasālaṃ karitvāna, agyāgāraṃ akāsahaṃ;

āraddhavīriyo pahitatto, vasāmi assame ahaṃ.

250. “Maṇḍape rukkhamūle vā, suññāgāre ca jhāyato;

na tu vijjati tāso me, na passe bhayabheravaṃ.

251. “Sumedho nāma sambuddho, aggo kāruṇiko muni;

ñāṇālokena jotanto, loke uppajji tāvade.

252. “Mama assamasāmantā, yakkho āsi mahiddhiko;

buddhaseṭṭhamhi uppanne, ārocesi mamaṃ tadā.

253. “Buddho loke samuppanno, sumedho nāma cakkhumā;

tāreti janataṃ sabbaṃ, tampi so tārayissati.

254. “Yakkhassa vacanaṃ sutvā, saṃviggo āsi tāvade;

buddho buddhoti cintento, assamaṃ paṭisāmayiṃ.

255. “Aggidāruñca chaḍḍetvā, saṃsāmetvāna santhataṃ;

assamaṃ abhivanditvā, nikkhamiṃ vipinā ahaṃ.

256. “Tato candanamādāya, gāmā gāmaṃ purā puraṃ;

devadevaṃ gavesanto, upagacchiṃ vināyakaṃ.

257. “Bhagavā tamhi samaye, sumedho lokanāyako;

catusaccaṃ pakāsento, bodheti janataṃ bahuṃ.

258. “Añjaliṃ paggahetvāna, sīse katvāna candanaṃ;

sambuddhaṃ abhivādetvā, imā gāthā abhāsahaṃ.

259. “‘Vassike pupphamānamhi, santike upavāyati;

tvaṃ vīra guṇagandhena, disā sabbā pavāyasi.

260. “‘Campake nāgavanike, atimuttakaketake;

sālesu pupphamānesu, anuvātaṃ pavāyati.

261. “‘Tava gandhaṃ suṇitvāna, himavantā idhāgamiṃ;

pūjemi taṃ mahāvīra, lokajeṭṭha mahāyasa’.

262. “Varacandanenānulimpiṃ, sumedhaṃ lokanāyakaṃ;

sakaṃ cittaṃ pasādetvā, tuṇhī aṭṭhāsi tāvade.

263. “Sumedho nāma bhagavā, lokajeṭṭho narāsabho;

bhikkhusaṅghe nisīditvā, imā gāthā abhāsatha.

264. “‘Yo me guṇe pakittesi, candanañca apūjayi;

tamahaṃ kittayissāmi, suṇātha mama bhāsato.

265. “‘Ādeyyavākyavacano, brahmā uju patāpavā;

pañcavīsatikappāni, sappabhāso bhavissati.

266. “‘Chabbīsatikappasate, devaloke ramissati;

sahassakkhattuṃ rājā ca, cakkavattī bhavissati.

267. “‘Tettiṃsakkhattuṃ devindo, devarajjaṃ karissati;

padesarajjaṃ vipulaṃ, gaṇanāto asaṅkhiyaṃ.

268. “‘Tato cutoyaṃ manujo, manussattaṃ gamissati;

puññakammena saṃyutto, brahmabandhu bhavissati.

269. “‘Ajjhāyako mantadharo, tiṇṇaṃ vedāna pāragū;

tilakkhaṇena sampanno, bāvarī nāma brāhmaṇo.

270. “‘Tassa sisso bhavitvāna, hessati mantapāragū;

upagantvāna sambuddhaṃ, gotamaṃ sakyapuṅgavaṃ.

271. “‘Pucchitvā nipuṇe pañhe, bhāvayitvāna añjasaṃ [hāsayitvāna mānasaṃ (syā.), bhāvayitvāna sañcayaṃ (ka.)];

sabbāsave pariññāya, viharissatināsavo’.

272. “Tividhaggi nibbutā mayhaṃ, bhavā sabbe samūhatā;

sabbāsave pariññāya, viharāmi anāsavo.

273. “Kilesā jhāpitā mayhaṃ…pe… viharāmi anāsavo;

274. “svāgataṃ vata me āsi…pe… kataṃ buddhassa sāsanaṃ;

275. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā todeyyo thero imā gāthāyo abhāsitthāti;

todeyyattherassāpadānaṃ aṭṭhamaṃ;