9. Jatukaṇṇitthera-apadānaṃ

276. “Nagare haṃsavatiyā, seṭṭhiputto ahosahaṃ;

samappito kāmaguṇe, paricāremahaṃ tadā.

277. “Tato [tayo (sī.)] pāsādamāruyha, mahābhoge valañjako [ubbiddhā gehaluñjakā (ka.), ubbiddhāgehalañchakā (sī.)];

tattha naccehi gītehi, paricāremahaṃ tadā.

278. “Tūriyā āhatā mayhaṃ, sammatāḷasamāhitā;

naccantā [rañjantī (syā.), rajjantā (ka.)] itthiyo sabbā, harantiyeva me mano.

279. “Celāpikā [celāvakā (syā.), velāmikā (pī.)] lāmaṇikā [vāmanikā (syā. pī.)], kuñjavāsī timajjhikā [kuñjavā sīhimajjhitā (syā.), kujjā vā sīhimajjhikā (pī.)];

laṅghikā sokajjhāyī ca, parivārenti maṃ sadā.

280. “Vetāḷino kumbhathūnī, naṭā ca naccakā bahū;

naṭakā nāṭakā ceva, parivārenti maṃ sadā.

281. “Kappakā nhāpakā sūdā, mālākārā supāsakā [sumāpakā (sī. syā.)];

jallā mallā ca te sabbe, parivārenti maṃ sadā.

282. “Etesu kīḷamānesu, sikkhite katupāsane;

rattindivaṃ na jānāmi, indova tidasaṅgaṇe.

283. “Addhikā pathikā sabbe, yācakā varakā bahū;

upagacchanti te niccaṃ, bhikkhayantā mamaṃ gharaṃ.

284. “Samaṇā brāhmaṇā ceva, puññakkhettā anuttarā;

vaḍḍhayantā mamaṃ puññaṃ, āgacchanti mamaṃ gharaṃ.

285. “Paṭagā [paṭakā (sī. syā.), padakā (pī.)] laṭukā [laṭakā (sī.)] sabbe, nigaṇṭhā pupphasāṭakā;

tedaṇḍikā ekasikhā, āgacchanti mamaṃ gharaṃ.

286. “Ājīvakā viluttāvī, godhammā devadhammikā;

rajojalladharā ete, āgacchanti mamaṃ gharaṃ.

287. “Parittakā santipattā [parivattakā siddhipattā (sī. syā. pī.)], kodhapugganikā [koṇḍapuggaṇikā (sī.), koṇḍapuggalikā (pī.)] bahū;

tapassī vanacārī ca, āgacchanti mamaṃ gharaṃ.

288. “Oḍḍakā damiḷā ceva, sākuḷā malavāḷakā [malayālakā (sī. syā. pī.)];

savarā yonakā ceva, āgacchanti mamaṃ gharaṃ.

289. “Andhakā muṇḍakā sabbe, koṭalā hanuvindakā [kolakā sānuvindakā (sī. pī.)];

ārāvacīnaraṭṭhā ca, āgacchanti mamaṃ gharaṃ.

290. “Alasandakā [alasantā (ka.)] pallavakā, dhammarā niggamānusā [babbarā bhaggakārusā (sī.)];

gehikā [rohitā (sī.), bāhikā (pī.)] cetaputtā ca, āgacchanti mamaṃ gharaṃ.

291. “Mādhurakā kosalakā, kaliṅgā [kāsikā (sī.)] hatthiporikā;

isiṇḍā makkalā ceva, āgacchanti mamaṃ gharaṃ.

292. “Celāvakā ārabbhā [arammā (sī. pī.)] ca, oghuḷhā [okkalā (sī.)] meghalā bahū;

khuddakā suddakā ceva, āgacchanti mamaṃ gharaṃ.

293. “Rohaṇā sindhavā ceva, citakā ekakaṇṇikā;

suraṭṭhā aparantā ca, āgacchanti mamaṃ gharaṃ.

294. “Suppārakā kumārā [kikumārā (sī. pī.)] ca, mallasovaṇṇabhūmikā [malayā soṇṇabhūmikā (sī. syā. pī.)];

vajjītaṅgā [vajjī tārā (sī.), vajjīhārā (syā. pī.)] ca te sabbe, āgacchanti mamaṃ gharaṃ.

295. “Naḷakārā pesakārā, cammakārā ca tacchakā;

kammārā kumbhakārā ca, āgacchanti mamaṃ gharaṃ.

296. “Maṇikārā lohakārā, soṇṇakārā ca dussikā;

tipukārā ca te sabbe, āgacchanti mamaṃ gharaṃ.

297. “Usukārā bhamakārā, pesakārā ca gandhikā;

rajakā tunnavāyā ca, āgacchanti mamaṃ gharaṃ.

298. “Telikā kaṭṭhahārā ca, udahārā ca pessikā;

sūpikā sūparakkhā ca, āgacchanti mamaṃ gharaṃ.

299. “Dovārikā anīkaṭṭhā, bandhikā [vandikā (sī.), ganthikā (syā.), sandikā (pī.)] pupphachaḍḍakā;

hatthāruhā hatthipālā, āgacchanti mamaṃ gharaṃ.

300. “Ānandassa mahārañño [ānandassa nāma rañño (syā.), arindamanāma rañño (pī.)], mamatthassa [pamattassa (sī. pī.), samaggassa (syā.)] adāsahaṃ;

sattavaṇṇena ratanena, ūnatthaṃ [ūnattaṃ (sī. syā. pī.)] pūrayāmahaṃ.

301. “Ye mayā kittitā sabbe, nānāvaṇṇā bahū janā;

tesāhaṃ cittamaññāya, tappayiṃ ratanenahaṃ.

302. “Vaggūsu bhāsamānāsu, vajjamānāsu bherisu;

saṅkhesu dhamayantesu, sakagehe ramāmahaṃ.

303. “Bhagavā tamhi samaye, padumuttaranāyako;

vasīsatasahassehi, parikkhīṇāsavehi so.

304. “Bhikkhūhi sahito vīthiṃ, paṭipajjittha cakkhumā;

obhāsento disā sabbā, dīparukkhova jotati.

305. “Vajjanti bheriyo sabbā, gacchante lokanāyake;

pabhā niddhāvate tassa, sataraṃsīva uggato.

306. “Kavāṭantarikāyāpi, paviṭṭhena ca rasminā;

antogharesu vipulo, āloko āsi tāvade.

307. “Pabhaṃ disvāna buddhassa, pārisajje avocahaṃ;

nissaṃsayaṃ buddhaseṭṭho, imaṃ vīthimupāgato.

308. “Khippaṃ oruyha pāsādā, agamiṃ antarāpaṇaṃ;

sambuddhaṃ abhivādetvā, idaṃ vacanamabraviṃ.

309. “‘Anukampatu me buddho, jalajuttamanāyako;

vasīsatasahassehi, adhivāsesi so muni’.

310. “Nimantetvāna sambuddhaṃ, abhinesiṃ sakaṃ gharaṃ;

tattha annena pānena, santappesiṃ mahāmuniṃ.

311. “Bhuttāviṃ kālamaññāya, buddhaseṭṭhassa tādino;

sataṅgikena tūriyena, buddhaseṭṭhaṃ upaṭṭhahiṃ.

312. “Padumuttaro lokavidū, āhutīnaṃ paṭiggaho;

antoghare nisīditvā, imā gāthā abhāsatha.

313. “‘Yo maṃ tūriyehupaṭṭhāsi, annapānañcadāsi me;

tamahaṃ kittayissāmi, suṇātha mama bhāsato.

314. “‘Pahūtabhakkho hutvāna, sahirañño sabhojano;

catudīpe ekarajjaṃ, kārayissatiyaṃ naro.

315. “‘Pañcasīle samādāya, dasakammapathe tato;

samādāya pavattento, parisaṃ sikkhāpayissati.

316. “‘Tūriyasatasahassāni, bheriyo samalaṅkatā;

vajjayissantimaṃ niccaṃ, upaṭṭhānassidaṃ phalaṃ.

317. “‘Tiṃsakappasahassāni, devaloke ramissati;

catusaṭṭhikkhattuṃ devindo, devarajjaṃ karissati.

318. “‘Catusaṭṭhikkhattuṃ rājā, cakkavattī bhavissati;

padesarajjaṃ vipulaṃ, gaṇanāto asaṅkhiyaṃ.

319. “‘Kappasatasahassamhi, okkākakulasambhavo;

gotamo nāma gottena, satthā loke bhavissati.

320. “‘Upapajjati yaṃ yoniṃ, devattaṃ atha mānusaṃ;

anūnabhogo hutvāna, manussattaṃ gamissati.

321. “‘Ajjhāyako bhavitvāna, tiṇṇaṃ vedāna pāragū;

uttamatthaṃ gavesanto, carissati mahiṃ imaṃ.

322. “‘So pacchā pabbajitvāna, sukkamūlena codito;

gotamassa bhagavato, sāsanebhiramissati.

323. “‘Ārādhayitvāna sambuddhaṃ, gotamaṃ sakyapuṅgavaṃ;

kilese jhāpayitvāna, arahāyaṃ bhavissati’.

324. “Vipine byaggharājāva, migarājāva kesarī;

abhīto viharāmajja, sakyaputtassa sāsane.

325. “Devaloke manusse vā, dalidde duggatimhi vā;

nibbattiṃ me na passāmi, upaṭṭhānassidaṃ phalaṃ.

326. “Vivekamanuyuttomhi upasanto nirūpadhi;

nāgova bandhanaṃ chetvā, viharāmi anāsavo.

327. “Kilesā jhāpitā mayhaṃ…pe… viharāmi anāsavo;

328. “svāgataṃ vata me āsi…pe… kataṃ buddhassa sāsanaṃ;

329. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā jatukaṇṇitthero imā gāthāyo abhāsitthāti;

jatukaṇṇittherassāpadānaṃ navamaṃ;