3-5. Puṇṇamantāṇiputtatthera-apadānaṃ

434. “Ajjhāyako mantadharo, tiṇṇaṃ vedāna pāragū;

purakkhatomhi sissehi, upagacchiṃ naruttamaṃ.

435. “Padumuttaro lokavidū, āhutīnaṃ paṭiggaho;

mama kammaṃ pakittesi, saṅkhittena mahāmuni.

436. “Tāhaṃ dhammaṃ suṇitvāna, abhivādetvāna satthuno;

añjaliṃ paggahetvāna, pakkamiṃ [pakkāmiṃ (sī. syā.)] dakkhiṇāmukho.

437. “Saṅkhittena suṇitvāna, vitthārena abhāsayiṃ [adesayiṃ (sī. syā.)];

sabbe sissā attamanā, sutvāna mama bhāsato;
sakaṃ diṭṭhiṃ vinodetvā, buddhe cittaṃ pasādayuṃ.

438. “Saṅkhittenapi desemi, vitthārena tathevahaṃ [desesiṃ vitthārenapi bhāsayiṃ (ka.)];

abhidhammanayaññūhaṃ kathāvatthuvisuddhiyā;
sabbesaṃ viññāpetvāna, viharāmi anāsavo.

439. “Ito pañcasate kappe, caturo suppakāsakā;

sattaratanasampannā, catudīpamhi issarā.

440. “Paṭisambhidā catasso, vimokkhāpi ca aṭṭhime;

chaḷabhiññā sacchikatā, kataṃ buddhassa sāsanaṃ”.

Itthaṃ sudaṃ āyasmā puṇṇo mantāṇiputto thero imā gāthāyo abhāsitthāti.

Puṇṇamantāṇiputtattherassāpadānaṃ pañcamaṃ.