9. Sayaṃpaṭibhāniyatthera-apadānaṃ

45. “Kakudhaṃ vilasantaṃva, devadevaṃ narāsabhaṃ;

rathiyaṃ paṭipajjantaṃ, ko disvā na pasīdati.

46. “Tamandhakāraṃ nāsetvā, santāretvā bahuṃ janaṃ;

ñāṇālokena jotantaṃ, ko disvā na pasīdati.

47. “Vasīsatasahassehi, nīyantaṃ lokanāyakaṃ;

uddharantaṃ bahū satte, ko disvā na pasīdati.

48. “Āhanantaṃ [āhanitvā (syā. ka.)] dhammabheriṃ, maddantaṃ titthiye gaṇe;

sīhanādaṃ vinadantaṃ, ko disvā na pasīdati.

49. “Yāvatā brahmalokato, āgantvāna sabrahmakā;

pucchanti nipuṇe pañhe, ko disvā na pasīdati.

50. “Yassañjaliṃ karitvāna, āyācanti sadevakā;

tena puññaṃ anubhonti, ko disvā na pasīdati.

51. “Sabbe janā samāgantvā, sampavārenti cakkhumaṃ;

na vikampati ajjhiṭṭho, ko disvā na pasīdati.

52. “Nagaraṃ pavisato yassa, ravanti bheriyo bahū;

vinadanti gajā mattā, ko disvā na pasīdati.

53. “Vīthiyā [rathiyā (sī.)] gacchato yassa, sabbābhā jotate sadā;

abbhunnatā samā honti, ko disvā na pasīdati.

54. “Byāharantassa buddhassa, cakkavāḷampi suyyati;

sabbe satte viññāpeti, ko disvā na pasīdati.

55. “Satasahassito kappe, yaṃ buddhamabhikittayiṃ;

duggatiṃ nābhijānāmi, kittanāya idaṃ phalaṃ.

56. “Kilesā jhāpitā mayhaṃ…pe… viharāmi anāsavo;

57. “svāgataṃ vata me āsi…pe… kataṃ buddhassa sāsanaṃ;

58. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā sayaṃpaṭibhāniyo thero imā gāthāyo

abhāsitthāti;

sayaṃpaṭibhāniyattherassāpadānaṃ navamaṃ;