9. Naḷakuṭidāyakatthera-apadānaṃ

93. “Himavantassāvidūre hārito nāma pabbato;

sayambhū nārado nāma, rukkhamūle vasī tadā.

94. “Naḷāgāraṃ karitvāna, tiṇena chādayiṃ ahaṃ;

caṅkamaṃ sodhayitvāna, sayambhussa adāsahaṃ.

95. “Tena kammena sukatena, cetanāpaṇidhīhi ca;

jahitvā mānusaṃ dehaṃ, tāvatiṃsamagacchahaṃ.

96. “Tattha me sukataṃ byamhaṃ, naḷakuṭikanimmitaṃ;

saṭṭhiyojanamubbedhaṃ, tiṃsayojanavitthataṃ.

97. “Catuddasesu kappesu, devaloke ramiṃ ahaṃ;

ekasattatikkhattuñca, devarajjamakārayiṃ.

98. “Catutiṃsatikkhattuñca, cakkavattī ahosahaṃ;

padesarajjaṃ vipulaṃ, gaṇanāto asaṅkhiyaṃ.

99. “Dhammapāsādamāruyha, sabbākāravarūpamaṃ;

yadicchakāhaṃ vihare, sakyaputtassa sāsane.

100. “Ekatiṃse ito kappe, yaṃ kammamakariṃ tadā;

duggatiṃ nābhijānāmi, naḷakuṭiyidaṃ phalaṃ.

101. “Kilesā jhāpitā mayhaṃ…pe… viharāmi anāsavo;

102. “svāgataṃ vata me āsi…pe… kataṃ buddhassa sāsanaṃ;

103. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā naḷakuṭidāyako thero imā gāthāyo

abhāsitthāti;

naḷakuṭidāyakattherassāpadānaṃ navamaṃ;