10. Piyālaphaladāyakatthera-apadānaṃ

104. “Migaluddo pure āsiṃ, vipine vicaraṃ tadā;

addasaṃ virajaṃ buddhaṃ, sabbadhammāna pāraguṃ.

105. “Piyālaphalamādāya, buddhaseṭṭhassadāsahaṃ;

puññakkhettassa vīrassa, pasanno sehi pāṇibhi.

106. “Ekatiṃse ito kappe, yaṃ phalaṃ adadiṃ tadā;

duggatiṃ nābhijānāmi, phaladānassidaṃ phalaṃ.

107. “Kilesā jhāpitā mayhaṃ…pe… viharāmi anāsavo;

108. “svāgataṃ vata me āsi…pe… kataṃ buddhassa sāsanaṃ;

109. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā piyālaphaladāyako thero imā

gāthāyo abhāsitthāti;

piyālaphaladāyakattherassāpadānaṃ dasamaṃ;

kiṅkaṇipupphavaggo paññāsamo;

tassuddānaṃ–

kiṅkaṇī paṃsukūlañca, koraṇḍamatha kiṃsukaṃ;
upaḍḍhadussī ghatado, udakaṃ thūpakārako.
Naḷakārī ca navamo, piyālaphaladāyako;
satamekañca gāthānaṃ, navakañca taduttari.

Atha vagguddānaṃ–

Metteyyavaggo bhaddāli, sakiṃsammajjakopi ca;
ekavihārī vibhītakī, jagatī sālapupphiyo.
Naḷāgāraṃ paṃsukūlaṃ, kiṅkaṇipupphiyo tathā;
asīti dve ca gāthāyo, catuddasasatāni ca.

Metteyyavaggadasakaṃ.

Pañcamasatakaṃ samattaṃ.