9. Sovaṇṇakiṅkaṇiyatthera-apadānaṃ

140. “Saddhāya abhinikkhamma, pabbajiṃ anagāriyaṃ;

vākacīradharo āsiṃ, tapokammamapassito.

141. “Atthadassī tu bhagavā, lokajeṭṭho narāsabho;

uppajji tamhi samaye, tārayanto mahājanaṃ.

142. “Balañca vata me khīṇaṃ, byādhinā paramena taṃ;

buddhaseṭṭhaṃ saritvāna, puline thūpamuttamaṃ.

143. “Karitvā haṭṭhacittohaṃ, sahatthena [pasādena (ka.)] samokiriṃ;

soṇṇakiṅkaṇipupphāni, udaggamanaso ahaṃ.

144. “Sammukhā viya sambuddhaṃ, thūpaṃ paricariṃ ahaṃ;

tena cetopasādena, atthadassissa tādino.

145. “Devalokaṃ gato santo, labhāmi vipulaṃ sukhaṃ;

suvaṇṇavaṇṇo tatthāsiṃ, buddhapūjāyidaṃ phalaṃ.

146. “Asītikoṭiyo mayhaṃ, nāriyo samalaṅkatā;

sadā mayhaṃ upaṭṭhanti, buddhapūjāyidaṃ phalaṃ.

147. “Saṭṭhituriyasahassāni [saṭṭhitūriya… (ka.)], bheriyo paṇavāni ca;

saṅkhā ca ḍiṇḍimā tattha, vaggū vajjanti [nadanti (sī.), vadanti (pī.)] dundubhī.

148. “Cullāsītisahassāni hatthino samalaṅkatā;

tidhāpabhinnamātaṅgā, kuñjarā saṭṭhihāyanā.

149. “Hemajālābhisañchannā upaṭṭhānaṃ karonti me;

balakāye gaje ceva, ūnatā me na vijjati.

150. “Soṇṇakiṅkaṇipupphānaṃ, vipākaṃ anubhomahaṃ;

aṭṭhapaññāsakkhattuñca, devarajjamakārayiṃ.

151. “Ekasattatikkhattuñca, cakkavattī ahosahaṃ;

pathabyā rajjaṃ ekasataṃ, mahiyā kārayiṃ ahaṃ.

152. “So dāni amataṃ patto, asaṅkhataṃ sududdasaṃ [gambhīraṃ duddasaṃ padaṃ (syā.)];

saṃyojanaparikkhīṇo, natthi dāni punabbhavo.

153. “Aṭṭhārase kappasate, yaṃ pupphamabhiropayiṃ;

duggatiṃ nābhijānāmi, buddhapūjāyidaṃ phalaṃ.

154. “Kilesā jhāpitā mayhaṃ…pe… viharāmi anāsavo;

155. “svāgataṃ vata me āsi…pe… kataṃ buddhassa sāsanaṃ;

156. “paṭisambhidā catasso…pe… kataṃ buddhassa sāsanaṃ”;

itthaṃ sudaṃ āyasmā sovaṇṇakiṅkaṇiyo thero imā

gāthāyo abhāsitthāti;

sovaṇṇakiṅkaṇiyattherassāpadānaṃ navamaṃ;